يماني يقول قصيدة في رشيد بن مساعد
<
في سنة من السنوات كان في الفرشة رجل من الجنسية اليمنية اسمه علي بن أحمد القطمي السيفي ويلقب بأبوعبدالله وكان يعمل في ورشة تابعة لفلاح بن فالح القباني وكان له أبناء اخت إثنين وكانوا في قرية العليا وصار لهم حادث على مثلث قرية العليا وحفر الباطن والنعيرية وانتقلوا إلى رحمة الله تعالى. وعندما علم ابوعبدالله بوفاتهم إتجه إلى فلاح بن فالح وأخبره بالموضوع وطلب منه الفزعة وكانت سيارة ابوفالح ليست معه في ذلك الوقت فذهب إلى اخيه حمد بن فالح رحمه الله فأخذ سيارته وأتاهم الشاعر رشيد بن مساعد ليذهب معهم لكبر مكانة ابوعبدالله عندهم ولكنهم حلفوا عليه بعدم الذهاب واتجهوا إلى الشيخ فلاح بن ماضي القباني وأخذوا منه ورقة تعريف ثم ذهبوا إلى قرية العليا واتجهوا إلى المستشفى مباشرة وأنهوا كافة إجراءاتهم وأخذوا المتوفين وغسلوهم وكفنوهم وصلوا عليهم ودفنوهم..... وبعدها قال هذه القصيدة الموجهة للشاعر/ رشيد بن مساعد القباني
أنا أول كلامي قلت ياحي يارواف=وياعالم الظاهر ويافاهم الخافي سماحك وغفرانك طلب عبدك الخواف=متى فاض روحه بعد ماكان متعافي عسى يا من أمرك والقضاء بين نون وكاف=تنزل ذنوبي والخطأ من على اكتافي وانا البارحه عيني تعيف النعاس اعياف=واجر القلم واكتب بيوتي على قافي تذكرت خوّت من سكنهم هجر ورياف=هل الطول واهل المرجله كمّن سنافي وانا من صداقة خايبين النبا حلاّف=واعاشر رجال اسلومهم عدل وانصافي بفضل الله اتجنبت درب الردا عفّاف=واحب الوفا والصدق لو دونه اتلافي ولي ربع فالفرشة يفوقو عليّ باضعاف=لهم فالمجالات الحميده نبا شافي هل العز والناموس تفزع مع الهتّاف=في الضيق والشدات مكيالهم وافي رجال الكرم والجود والضيف والمضياف=ومن غاب منهم يعتبر من حضر كافي يقوله مجرب ذاق مر الزمان اصناف=نهار القدر ساقت على ربعنا لافي وابوماضي اسعفني بذاك الخطاب اسعاف=له البيض تنشر من على كل مشرافي ركب موتره واشمر مع مالصباح اشتاف=وابوفالح اتحمل مراحي ومعطافي يدل المناطق والمراكز بدون اوصاف=تقول ان راسه كمبيوتر وجغرافي وجاني رشيد وقال لي ماهناك خلاف=لزومك ترى بقضيه لو رحت له حافي وانا اعتز واتشرف بخوّة رجال اشراف=سواليفهم وطبوعهم قمّة أهدافي على الجوده اتربوا يوم السنين عجاف=وعاد المطايا تنقل افراد واردافي لهم حظ وافر في الشبب من ورى لاسلاف=عيال الحمايل ما نفى علمهم نافي سلامي لهم مايلمي البارق الرفاف=وماهل مزنه من غزيرات القنافي ووجدي عليهم مثل ما الحاشي الميلاف=إلامن ورى البل حده الراعي الجافي إلامن قيده وامكن رباطه وحط أشناف=ولاهو بداهل حد يرده من العافي قعد يلتوي فالربط يوم أدبر المحظاف=بغى البل ودون البل تماطير واشعافي وياحز قلبي حزة السلف بالحذاف=في الموتر اللي يشتغل وانثنى طافي وراحت سنون الترس حتى غدا مستاف=تعطل ولابه حول سواقه اسعافي على اللي حتفهم حكم رب الملا الحتاف=مشل وسعد وحمد حميدين الوصافي عساهم في الفردوس العلا وحور الطاف=ومسكن طبيعي لا ببارد ولا دافي طلبهم محضر والفواكه لها قطاف=ونهر اللبن جاري ومثله عسل صافي وكم غيرهم تبقى عليه الكبود ارهاف=ورى الجود يذري من على قبره السافي ورب الخلايق ماورى حكمه إستئناف=وله كل مايعطي واخذ وامره الضافي واصلي على طه النبي ماقرو العراف=وماطاف بأركان الحرم كل طوافي وكان الشاعر يتوجد على مشل بن مساعد وسعد بن ضويحي وحمد بن فالح رحمهم الله جميعا ورد الشاعر/ رشيد بن مساعد القباني بهذه القصيدة
لفاني بيوت هيضتني وانا مشعاف=مع الفاكس ساعة جات قلبي لها زافي كما زاف روض عله الوابل الهتاف=عليه أنتثر من غر الامزان هتافي بيوت جزيلات المعاني مهيب ضعاف=تفوق الجواهر بالثمن عند صرافي على جيها لو بشروني باسوق آلاف=ولاكان ربي ماومرنا بالإسرافي لفتني من القطمي وقدني على ميهاف=نحو خاطري ينقاد للصاحب الصافي وساعة قروا مضمونها صار بي خفخاف=وجفني سهر من لذة النوم متجافي وغدى وسط صدري مثل طبل معا دفاف=إلامنه دقه ليلة الحفل دفافي يطقه شطير شاقه الصف والعزاف=وطالع بعينه من المزايين غريافي ومن شافني يقول في عقله إختلاف=أسجم وكل في لذيذ الكرى غافي وأنا أنوب عن ربعي برد التحية كاف=تحية طويل عمقها قطرها ضافي هلا بالرساله عد منهو لمكة شاف=وعدد مابرق من ناشي المزن كشافي أنا أفز لامنه لفاني جزيل القاف=ما أحب البيوت إن صار فيها تعجرافي وياراكب اللي لامشى للجلد خطاف=إلامن عطى دو غدا له ترشافي أمير الجيوب وسايقه نشمي حواف=وملفاه قرم للمناعير مضيافي يوصل علي مثايل صعبة الولاف=جزيلة وقلبي للجزيلات ميلافي ترى عوص لانضا لاتعصت لها عساف=وأنا للمثايل لاتعصن عسافي مير السابق الاول لحلو الزهر قطاف=والاخير دايم حقه الدوس وعذافي ألا ياعلي حامي الركايف وهن زلاف=لامن أشهب البارود جاله تقصافي وياعيدهن لامن اقبلن كنهن اقراف=تسالس باهلها هزلة عقب لصلافي ترى ماعليكم زود ياملتجى من خاف=طموحين للعليا عزيزين واشرافي تراكم هل المعروف من عصر وقت طاف=لكم موقف في ما مضى نعم ميقافي لكم ياعلي صحايف من العيوب نظاف=عن العيب ودروب الردا بيض ونضافي نوادر حرار في مخاليبها لاتلاف=في وقت الهدد لطماتها مالها رافي تصدون الأعداء في اللقاء والجموع أرداف=إلامن حصل صولات من بين الأطرافي ترى العين يالقطمي فراش لكم ولحاف=أقوله وأنا لاقلت مانيب زهافي لكم بالوداد إقلوبنا والكبود صخاف=غلاكم طبع بصدورنا بين الأنجافي عسى نجتمع من قبل يبطش بنا القصاف=أمر الله تراه بنطقة النون والكافي ترى العود يضرم لوتنبنب وطال وغاف=وترى ياعلي للعمر طارد ولقافي وصلاة عدد ماغرد الورق بالغطراف=على المصطفى ماناظة بروق الأصيافي وعدد من لقط جمرات من بعد الانصراف=وكمل شروط الحج وأنوى بالإنكافي وتقبلوا تحيات اخوكم عديل الروح وجميع الحقوق محفوظة لدى عديل الروح |
< الوفاء والكرم من طبع الكرام ليست غريبة على أبناء العرب وهذه العادات حث عليها ديننا الإسلامي الحنيف وكانت موجود قبل الأسلام وزاد عليها أن أضاف الأجر والمثوبة لمن قام وساعد بها . نشكر أخينا عديل الروح على مساهمته في توثيق مثل هذه المواقف . |
< الله الله صح لسان ابومساعد وصح لسان ابوعبدالله وبيض الله وجهك ياعديل الروح والله القطمي مهوب سهل اكثر شي يعجبني في قصيد ابومساعد غزارة الألفاظ وسلاسة المعني وجزلة معهودة وغير مستغربة مشكور ياعديل الروح وتقبل تحياتي |
< بيــض الله وجهــك على ايراد القصه والقصيده
وصح لسانك ولسان الشاعر ابو عبدالله والشاعر ابو مساعد واتمنى من الله ثم منك ان تنزل جميع القصائد التي دارت بين الشاعرين وتقبــل تحيات نــــــــــــــــــــــــــ ؟؟؟؟؟؟؟؟؟؟؟؟؟؟؟؟؟؟؟؟كـــــــــــــــ |
< بيض الله وجهك يا عديل الروح
وهذي القصايد اللي تطرب وتقراه كم مره ,,, وكل مره تعجبك أكثر وأكثر وعز الله ذا اليمني يستاهل الفزعة ، ورجال يعرف المعروف وما ينساه ثم طيبكم وشهامتكم يا عديل الروح ،،، خصلة متأصلة فيكم مهيب تصنع ،،ولا كم واحد بيصد وبيقول هذا يماني بكيفه لاكن في مثل هذا الموقف تخرج معادن الرجال ولي ربع فالفرشة يفوقو علـيّ باضعـاف******لهـم فالمجـالات الحميـده نبـا شـافـي هل العز والناموس تفـزع مـع الهتّـاف*****في الضيـق والشـدات مكيالهـم وافـي رجال الكرم والجود والضيف والمضيـاف****ومن غاب منهم يعتبر مـن حضـر كافـي وصح لسان ابو مساعد وكما قال هو : ترى عوص لانضا لاتعصت لها عسـاف****وأنـا للمثـايـل لاتعـصـن عسـافـي اي والله تعسف المثايل يا ابو مساعد وكفوا ومثل هالقصيدة تتميز بغزارة المعنى وجزالة الوصف وسلاسة الألفاظ وسهولتها ولعلك تسمح لي أخوي عديل الروح أمثل بيتين من القصيدة مثل ذا البيت اللي إختصرت وصف الجيب بكلمتين أمير الجيـوب وسايقـه نشمـي حـواف*****وملفـاه قــرم للمناعـيـر مضيـافـي امير الجيوب وش بعد غير هالوصف معاد يحتاج يطول ويسهب في الوصف والمثال الثاني شف وشلون يوصف دق قلبه / يطقه شطيـر شاقـه الصـف والعـزاف*****وطالع بعينـه مـن المزاييـن غريافـي وصف دق قلبه مثل / 1- دق طبل 2- اللي يطقه شطير ( خبير ) مهوب يتعلم 3- وهالشطير ( صلح له اللعب وأعجبته الصفوف ) يعني بيطق الطبل صح 4- وزاد على ذا كله شاف له بنت مزيونة تشوف اللعب أنا أشهد أن ذا الطبل راح فيها :) :) والقصيدة جزله وجميع أبياتها من أروع مايقرأ وتجد فيها صدق العاطفة ترى العين يالقطمي فراش لكـم ولحـاف*****أقولـه وأنـا لاقلـت مانيـب زهـافـي لكم بالـوداد إقلوبنـا والكبـود صخـاف******غلاكم طبـع بصدورنـا بيـن الأنجافـي وفي الختام صح لسان الشاعر والوالد ابو مساعد وأمل يا عديل الروح أن تزودنا دائما بقصائد ابو مساعد وكما سمعت أن بينه وبين هذا اليمني قصائد عديدة فياليت تعطينا منها وسلامتكم فهد ال ثلاب |
< صح لسان والدنا الكبير , بومساعد , وصح لسان القطمى والله يرحم ابناء اخته رحمه واسعه , وعزالله ان القطمى صدق ويستاهل بومساعد والجماعه المدح ماهى غريبه عليهم , هذى فعولهم وفعول الجماعه الفزعه للقصير والضيف , والله يرحم مشل وحمد وسعد ويسكنهم الجنه , واخيرا ياعديل الروح تقبل كل تقديرى واحترامى
|
< اقتباس:
وصح بدنك نيابه عن الشعراء وجهك ابيض وشكرا علي الاطلاله |
< اقتباس:
وبحاول قدر المستطاع ايراد مادار بين الشاعرين وياليت يالعروان توضح الاستفهام ولانريد الالغاز والتي ليس لها داع لاننا بين اخواننا في منتدى القبابنة وانا انسان واضح وصريح:h035: |
< الاخ فهد ال ثلاب
اشكرك على مرورك واطرائك الجميل والاكثر من رائع وفي القريب العاجل ان شاءالله سنوافيكم بما دار بين الشاعرين من قصائد اخوكم / عديل الروحِ |
< اقتباس:
الاخ حد الرهيف صح بدنك نيابه عن الشاعرين والله يرحم امواتنا واموات كل المسلمين وشكرا لك علي المرور اخوكم / عديل الروح |
< بيــض الله وجهــك على ايراد القصه والقصيده
وصح لسانك ولسان الشاعر ابو عبدالله والشاعر ابو مساعد لاهنت |
< اخوي ناصر حضرم العنقودي ووجهك أبيض ومن قال مايهان وأشكرك على المرور عديل الروح |
< الصوت
ولي ربع فالفرشة يفوقوا عليّ بأضعـاف=لهـم فالمجـالات الحميـده نبـا شافي هل العز والناموس تفـزع مـع الهتّـاف=في الضيـق والشـدات مكيالهـم وافي الصدى
ترى ماعليكم زود ياملتجى مـن خـاف=طموحيـن للعليـا عزيزين واشـرافي تراكم هل المعروف من عصر وقت ٍ طاف=لكم موقف ٍ في ما مضى نعم ميقافي لا رفعت الصوت يرجع لك صدى آه يا ماأحلى المثل أخوي عديل الروح مشكور على إظهارك لهذه الروائع خصوصاً القصائد المتبادله بين الشعراء لها مذاق خاص عند متذوقي الشعر فلا تبخل علينا بها يعطيك العافية |
< بيض الله وجهك يا عديل الروح
وهذي القصايد اللي تطرب وتقراه كم مره ,,, وكل مره تعجبك أكثر وأكثر وعز الله ذا اليمني يستاهل الفزعة ، ورجال يعرف المعروف وما ينساه ثم طيبكم وشهامتكم يا عديل الروح ،،، خصلة متأصلة فيكم مهيب تصنع ،،ولا كم واحد بيصد وبيقول هذا يماني بكيفه لاكن في مثل هذا الموقف تخرج معادن الرجال |
< ألف شكر |
| الساعة الآن 03:05 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by