يقول القريشي والقريشي محمد = ابن جمل يبدع جزيل القيل
يحارب جنود الياس بمهند الرجا = بالايمان سيف المومنين صقيل
يخايل شعاع الامل من نازح النيا = وصبره على حكم الإله جميل
انا ماشغفني بالهوى حب كاعب = ولا انهل دمعي بالغرام هميل
وانا ماشكيت الغبن بين العوادي = ولا اجامل العايل نهار يعيل
وانا ما استدِر المال من كف تاجر = ورزقي على الله ما رجيت بخيل
ولكن دهى حال الخبوت المريفه = مايودع الفند الجثيل نحيل
سراب القوايل في مدى البيد لامع = والدار من صفق الدهور هزيل
عصرٍ تتالت فيه عوص النوايب = ما مر مثله في العصور مثيل
تقفي مثل هوج الهبايب سنينه = ويلهي خليل ٍ عن وصال خليل
ألا ياعجاج القيظ يامردف العنا = الظل رمضا والنهار طويل
متى يستقل سهيل في قبة اليمن = ولا عاد نوحي للسموم صليل
تقول التجارب في سجلات مامضى = مصير المسايل يا سنين تسيل
عسى مع دخول الوسم همال بارق = على درب نوه في المضامي غيل
لعله ليا انشا من سواحل تهامه = وسرا بارقه يرفع ستار الليل
تسوقه نوايا فالق الحب والنوى = يكيله على النسناس ميكائيل
يدني رحاله في ربوع الجزيره = والطرف من شوف المزون كحيل
لياليه تشرق بالبروق اللوامع = وضحى الشمس غيمه فالديار ظليل
ربابه ليا سبح قنيفه وهلل = نعام ٍ تقلل من عصير جفيل
من يدين معبود ٍ جزيل الوهايب = على فروع وديان القرايا سيل
يحول من اطراف الحجاز النوايف = قشاشه على الرملة جذوع نخيل
فوادي على شوف الفيافي مهايم = ليا لبست انواع الورود إكليل
امد النظر من راس طود(ن) خلاوي = على سفحه الغربي مرابط خيل
يسامر بجوف الليل بيض الكواكب = طريد الضواري في حجاه دخيل
مطل ٍ على ريضان دار ٍ مقيمه = على خدها نال الشموخ رعيل
فياح ارضها تلعب به الريم والمها = وعلاوي مساقيها روافد نيل
لعلك رواح الغيث يادار عامر= مداهيل جد ألفين جيل وجيل
يفادونك الغلباء على كل سابح = ليا جا لسرب العاديات صهيل
كم حاكم ٍ يوم اللقا حولو به = عن المغازي غيبوه ذليل
تحت بيرق التوحيد ترخص نفوسهم = لهم في ميادين الجهاد سبيل
تخطو مع اول جيش صقر الجزيره = وخلو حصون الحاربين نثيل

ألا ياعجاج القيظ يامـردف العنـا=الظـل رمضـا والنهـار طـويـل