عيني ما لِدّ بنظرها في قصايرها=نفسي عزيزه وبالشيمة مضرّيها
قصيرتي مابعد كدّرت خاطرها=ولانيب أجيها إلا من غاب واليها
مانيب خطوات مغلول يخازرها=لاغاب جاره بحث مكنون خافيها
ناهات نفسي عن المنقود عاذرها=وفي المشطفات المعيبة مانماديها
طرق العلا واضحة والكل خابرها=ولاكل رجل صعد مصعد عواليها
بعض الملا تاثق بلمحة ظواهرها=لاشك يكشف مغطّاها مماشيها
في مسلك أهل الردى تكثر عثايرها=ولاتنطح الموجبه لاجيت ناصيها
وبعض الملا ماتحسّب في خسايرها=غيث على الجار وتكرّم عوانيها
تشوف مبدا الرجوله في نواظرها=كسّابة للثّنى في اول مباديها
يقوله اللي هل الطوله يعاشرها=رفقة هل المجد باغلى المال يشريها
ياجاهل اسمع حروف لك معبرها=مثايل كنها المرجان ناقيها
أهل الردى والرذاله لاتجاورها=تراك تِبلى وتِجرم في بلاويها
والفانيه لاتغرّك في تعطّرها=لابد من مرّها من عقب حاليها
لاكان تضحك وتلبسلك جواهرها=نكباتها لو صفت لك ماتخلّيها
دنيا تمكر بنا وإنا نسايرها=نركض وراها ويتعبنا تحدّيها
إخذ حساب السفر فإنك مغادرها=حدّك ليالي قليلات تمضيها
ليالي ماتعلّمك بسرايرها=ياما رمت من ارجال في معاديها
سيّس بنا دارك اللي كنت ناحرها=سوى على خير والاّ شر تلفيها
لابدّ من ساعة ترسي بواخرها=ولايندرى بأي وقت فيه يطريها
ولابه مفرّ ومطير عن مخاطرها=لو في حصون رفيعات مبانيها
وش عذرنا نعمة الإسلام ننكرها=ونترك حقوق علينا مانبدّيها
هذي مظرّه لنفس العبد يثّرها=تِطغيه دنيا حياة الكِره تاليها
تمّت وصلوا على المختار بآخرها=اللي جميع امته للخير يدعيها

أبيات جميلة ونصيحة رائعة من الوالد لأبنائه جعلها الله في موازين أعماله ونشكر جزيل الشكر أخينا عديل الروح

أخوي عديل الروح
شرفتنا بهذه الرائعة المستقاة
من روائع الراوي والشاعر رشيد بن مساعد
أطال الله في عمره فهو علم من أعلام الشعر
وعملاق من العمالقة الكبار الذين نفتخر بهم
فهنيئاً لنا به وهنيئاً لنا بك لتواجد معنا وإثراء هذا الصرح
بالمشاركات الأكثر من رائعة
دمت برعاية رب العزة والجلال