منتديات القبابنة - قبابنة في اللقاء عدمين وثقالي

قصيدة ترحيبية للشاعر والراوية رشيد بن مساعد القباني وألقاها نيابة عنه إبنه الشاعر صابر وذلك ترحيباً في إخواننا وضيوفنا من المنطقة الشرقية ودولة الكويت الشقيقة آل صديان وآل نويف أثناء تشريفهم حفل زواج الشاعر فلاح بن رشيد
الذي أقيم بمحافظة حوطة بني تميم يوم الخميس 19/7/1431هـ الموافق 1/7/2010م

أببتدي بسم رب ٍ عالم ٍ عالي=رب الملا خالق الإنسان والجني
محيي عروق الهميد الخامد البالي=وبأمره ثقال المزون الغر ينشني
محصي جميع الخشاش دقاق وجلالي=والأرياح بأمره وتصريفه يهبني
ومن بعد ذا باتنقى زين الأمثالي=مثايل ٍ تعجب اللي وده يغني
مثايل ٍ ندّر ٍ في الصدر تجتالي=وإلى بغينا عواصيها يطيعني
أشتاق وأحبها لاصارت جزالي=وأتعب على جزالها مادام يمكني
للمفردات الجزايل ينشرح بالي=ونسوقها لين فيها نحسن الظني
أسوقها لين عسرتها تهيّالي=ندّر بيوت ٍ معانيها يشوقني
لامن وردت الطويلة تارد حبالي=أسقي ورودي بدلوي لين يروني
ولا أقول أنا واقف ٍ للشعر بالحالي=غيري عدود ٍ عميقه مايغورني
غيري فحول ٍ تعدل القاف لامالي=تازن حروف القوافي لايعيبني
هذا وأرحب عدد ماهملل خيالي=ومن كان زار الحرم من شيعي وسني
بضيوفنا اللي لفوا كل أبلج ٍ غالي=طافت سنين ٍ على رؤياهم أحني
حمولتين ٍ لهم في الصدر منزالي=ذكراهم بخاطري مافاختوا عني
هلا هلا يابني صديان الأشبالي=فإقبالكم ببتدي بالرحب وأثني
ياكاسبين الثناء وافين الأخصالي=لاشفتناكم هموم الصدر زالني
وأبناء النويف هل النخوة والأفعالي=ذبّاحة ٍ للغنم وتحرّق البني
فإقبالكم يالضيوف الجو يصفالي=قد كنت في مثل هذا اليوم متمني
إنا لكم لاصفق جال ٍ على جالي=وتجاولن الضرايا ثم تعاوني
حنا جبل هضبة ٍ له كنّ وظلالي=وأنتم فروع ٍ من فروعه يعدني
أنتم بني عم وإخوة مابه شكالي=مير الظروف أبعدت بأضعانكم مني
ماب أصلنا لصمقة زيف وتحيّالي=محاركة مادخلنا الشك والظني
قبابنة في اللقاء عدمين وثقالي=وأقدامهم في نهار الضيق يرسني
سهول ٍ لامنه تنازت شهب الأذيالي=طريحهم فوقه الزلبات ياطني
لاحذفن مترفات البيض بشيالي=ولجّن بالأصوات للشجعان ينخني
يردون ورد الظمايا بأشهب اللالي=لانشّف الريق والأذهان راغني
يفرح بهم ضمّر ٍ من البعد هزّالي=لاجات عقب الصلف من الحيف يشكني
يلقون أهلها تراحيب ٍ وتهلالي=بشاشة وجيه ودلال ٍ يصبني
وصياني ٍ في القسا ينفق بها أموالي=وقت المجاعة عليها الحيل يجفني
وترى القبايل لهم بيعان ٍ طوالي=وكل ٍ لكسب المراجل خيله يعني
مانيب من هو يهضم حقوق الأبطالي=عقبان نجد ٍ مخالبها يصيدني
هذا وتم الكلام وشابت أقوالي=ولاهوب ضعف إقتراحي يوم شابني
وختامها أرجي العفو في يوم الأهوالي=وأرجي عسى يمّن السامع ويمّني
يوم المراضيع من الأهوال ذهالي=عن ماأرضعن في هذاك اليوم يلهني
وصلوا على المصطفى ماهل همالي=ومافوق خضر الغصون الورق ناحني