منتديات القبابنة - الحب من أول عطسه

كان ياماكان ماهو في قديم الزمان
مير في وقتنا الآن
هذا سلمني الله وسلمكم
مسيكين مثل عاشق نجد
هذا واحد من الشباب اللي
حظهم طايح
خريج مع وقف التنفيذ مالقى له وظيفة
حتى بعد السعودة اللي ذبحونا فيها
سعودة ( بنشري ـ كناس قصدي عامل نظافة )
هذا الشاب المسكين
خمع في كبد ابوه فقع مرارته
مير ويشتري له ابوه ( بقس ) يعني فان وفكه على النسوان ( لاتروحون بعيد )
ينقل المعلمات مير وهو اللي
يحذف كراسي الفان وفرش الأرضية اشكال والوان
زولية ومخدات وبطاطين ( حسب طلب المعلمات )
ليه هالطلب الغريب ( طول المشوار وطول الوقت بين القرية
والمدينة )
المهم بينه وبينهن ستاره
وإلى اجتمع الشمل واخذ الفان يتهادا مبتعداً عن ديار
الأهل واشتهن الأكل
اميط اللثام و وضع الطعام وكثر الضحك والكلام
والشاب الداهيه كله شفافية وآذان صاغيه
والى جواره ( ابليس الفانات )
يسمعه الهمسات ويصور له الهامسات
وفي مشوار العودة
تغمض العيون ويخيم على الفان السكون
وتمر الأيام تلو الأيام ويزداد في قلب الشاب الضرام
ويزين له الشيطان الحرام
( وذات مسيان ) يعني بعد المغربية وهم في طريق العودة
وبينما يتعالى شخير النسوان
رفع الشاب الستار ليهتك الأستار ويكشف الأسرار
فما وجد الا السواد تحاط به الأجساد
فأسدل الستارة وانشغل بقيادة السيارة
وفي يوم آخر اشتد عليه الزكام وكان يعطس بشدة الظاهر معه حساسية مثل محاكيكم ( عاشق نجد)
يقولون التخاترة إنها موسمية ماعلينا نرجع لموضوعنا
عطس هالشاب المسكين
فشمتته احدهن وقالت له : هل لك في بييلة زنجبيل ترى ماهنا أحسن منه
زينن بالحيل
ومدت له بياله تلو بياله وشرب من يدها حتى الثمالة
وضبط على صوتها راداره وانشغل بها ليله ونهاره
اذا همست رف قلبه وطار لبه وقام يدعو ربه : يارب عساها
بنت فلان بن علان
اللي بيتهم في ذاك المكان
وفي يوم لم يسمع لها صوت فاختنق حتى الموت
فتعاطس وتعاطس يستجدي التدليل وبييلة الزنجبيل
ولاكن لا حياة لمن تعاطس
( وجع وش بلاها )
مير ويقول له شيطان الفانات : تعمد تعطيل الفان وكلم النسوان
وصدقني حبيبك بيبان
وقف الفان واخمد جواله واستنجد بالنسوان :
الموتر خربان يا خوات وجوالي فاضيتن أحجاره قصدي البطارية , من معها جوال نتصل
على احد يسعفنا؟
هي : سم الجوال
اتاه صوتها كالنسيم العليل
ابتعد عن الفان واتصل على جواله ثم مسح رقمه من جوالها ( مسوي فيها ذكي )
واتصل على صديق له وتظاهر بأنه يرشده لحل المشكله
اصلح العطل المزيف واعاد لها الجوال ( الهاتف المشيول )
وخزن رقمها تحت اسم زنجبيل
وفي اليوم التالي تعمد التأخر عليهن لعلها تتصل عليه فلم
تفعل
وكرر محاولاته فلم ينجح
وبينما كان ينتقل من منزل لمنزل في صباح ذلك اليوم
السعيد مير وهو اللي يرن الجوال
واذا بها زنجبيل
هي : الوه
هو : نعم
هي : بنت فلان تعتذر ولن تذهب للمدرسة اليوم
هو : سمّي
لم يستطع اخفاء فرحته
لقد عرفها وعرف انها شابة مثله لم تتزوج بعد
فتقدم لخطبتها من ابوها فرفضه وبشده وألغى عقده معه
فأصابه الهم والغم لفقدها ولفقد صويحباتها
فقد ذهبن معها
وبدئ مشوار البحث عن غيرهن
وبعد شهور من الفراق وعلى حين غفلة منه رن الجوال واذا
بها هي المتصلة
فرد عليها بلا شعور: زنجبيل
هي : وش زنجبيله
هو: عفواً من انتي
هي : انا بنت فلان بن علان
هو : سمي آمري
هي : ما يأمر عليك عدو ، بس ودنا نتعاقد معك ثانية ان
كانك فاضي
هو : وابوك
هي : الله يرحمه
هو : صحيح ؟؟ عفواً احسن الله عزاك وتغمده بواسع رحمته
هي : جزاك الله خير ، هاه وش قلت
هو : ما عندي مانع , من العام الدراسي الجديد طبعاً
هي : لا من هلحين وترى خوياتي معي
هو : واللي انتم متعاقدين معه وش تسوون به
هي : تركناه الكلب
هو : افا وش مسوي
هي : فاك علينا الستاره
هو : الله يستر
هي : وش قلت
هو : عندي شرط
هي : وش شرطك
هو : تقبلين تزوجيني
اغلقت الهاتف بعد صمت طويل ودون جواب
فأرسل من يجس النبض فأتته الموافقه المبدئية
تم الزواج وسعد الزوجين
وفي يوم من الأيام وجدها غاضبة وفي يدها جواله
هو : وش السالفة
هي : انت اللي قلي من هي زنجبيل هاللي تكلمك وتكلمها
هو : انتي يا حياتي
واخبرها بالتفاصيل وجرب لها الرقم فضحكت من قصة حبه
وقالت ان كنت حبيت من اول زنجبيل فأنا حبيت من اول
عطسه
وسلامتكم وسلامة المشاهدين
وسلامة
عاشق نجد