الله من ليل تلامع نجومه=والله من قلب شكى الهم سهران
كلن مع خله تهنى بنومه=وانا وحيد ساهر والضحى بان
اعوي كما ذيب بعالي رجومه=واصيح وازمجر واتزجر وزعلان
زعلان من خل تمحت رسومه=راح وتغير وابدل القرب هجران
اسهر معه دايم واسامر علومه=ومن اول والله حبايب وخلان
مدري هو السبه عوايد سلومه=والا تغلي من غدير لعطشان
يا سعود بن ثلاب نفسي كتومه=لاشك قلبي فيه مغرم وولهان
باقي على حبه لوني الومه=في ذمتي لو املك الصين وعمان
مالي سوى رب ينشي غيومه=يحي هشيم القاع من غر الامزان
يبرج لعين منه دوم محرومه=تبكي عليه شهور واسنين وازمان
وايضاً لقلب كاثرات همومه=قلب حريص للموده وشفقان
وصلاة ربي عد من طاب نومه=على النبي المصطفى نسل عدنان

وين يافهد حرام عليك
موهبه مثل حمد ولا تظهر للنور
وبعدين ما يصير قصيدة وحدة ترى حنا طماعين
هو كريم وحنا نستاهل كل الإمنيات له بالتوفيق
وتحياتي لك يافهد والشكر موصول
لأخونا حمد على رائعته الجميلة

فهد ال ثلاب
مشكور اخوي على المشاركة وصح لسان الشاعر