منتديات القبابنة

منتديات القبابنة (http://al-qbabnh.com/vb/index.php)
-   شعراء القبيلة وماقيل فيها (http://al-qbabnh.com/vb/forumdisplay.php?f=8)
-   -   عليت يا اس بعزك تعليت (http://al-qbabnh.com/vb/showthread.php?t=13783)

عبدالمحسن القباني 07-01-2018 03:47 PM

عليت يا اس بعزك تعليت
 
<
مرثية في والدي رحمة الله المتوفى 16/12/1426
تنشر لاول مرة

امس الضحى من فوق ابالقد عديت
ولولا الحيا كان انتخي واشتكي له
اخايل خشومه خلافي و غنيت
شره على الي حدني يوم اجي له
يامسندي ياليتني منك ما أوحيت
بيتين واحيت بي هموم ثقيله
ذكرتني يومي نسيت وتناسيت
وداع وجه العود عقب تغسيله
كنه يناظرني وانا ابكي وصديت
والدمع سابق عبرتي مع مسيله
من يوم غسلته علي اظلم البيت
وأحس في جوفي بصالي مليلة
يامطرق حامي على كبدي اوميت
ارفق على كبدي جروحي عليله
لو التمني فاد صحت وتمنيت
صحت ورفعت الصوت ساعة رحيلة
ياليتني قبل يتوفى توفيت
والا كفوفي من ترابه تشيله
يا الموت اثقلته عليه وتقويت
وحيل الله اقوى مالنا فيك حيلة


يا الموت ماذليت يومك تدانيت
وينازع السكرات صوت تهليله
يا الموت اتعبته عيوني وخليت
دمعي على جيبي تزايد هميله
وياقبر لو تدري من اليوم ضميت
ماعاش فيك الدود باللحد ليله
وياقبر لو تدري من اليوم ضميت
صارت نصايبك القصيرة طويله
حدرت فيك اغلى من اغلي وسميت
رصيت لبن فوق لحد بني له
وهديت فوقك من ترابك وشديت
نصايبك فوقك ابيها دليلة
وسقت النظر يم القبور وتماليت
وكل مثل قبره لحافه نثيلة
وبركت مابين النصايب وحنيت
حان الوادع وماقويت ارتكي له
ابي الصبر ولا قدرته وعانيت
الي بقلبي له وش الي يزيله
يالله يالي ما لغيرك ترجيت
تجبر عزى قلبٍي وترفا شليله


ياخالق المخلوق يامحيي الميت
محيي العظام الباليات الننحيلة
يارب كفي لك رفعته ومديت
ان ماغفرته له فمن يلتجي له
ابوي ضيفك ياكريم ليـَ اعطيت
شيبه دخيلك يامنجي دخيله
اغفر ذنوب العود يامن تعليت
وفي جنة الفردوس جار لخليله
يابوي لبى ونتك يوم ونيت
حملك على كتفي ازمه واشيله
ويابوي لبى ضحكتك كل ماوحيت
صوتك يلج بوسط قلبي صهيله
ويابوي لبى خطوتك كل ماقفيت
تبى خشم خرشا وخشم قبيله
يامعشي الطرقي ولو ما تعشيت
قصر مفرع والموارد قليلة
عن واجب الضيفان ماقد تغبيت
باب الكرم ماله قفول وتيله
تسري طوال الليل تروي ليـَ اسقيت
تروي الهمل ماهج منها هميلة


تبي ثواب الي فعلته وسويت
في ساعة كل يحسب حصيله
لماع والنقعه بفعلك لها صيت
وتمر الخزامي لـِ صرمته نخيله
عليت ياراس بفعلك تعليت
عاصرت من عمرك سنين طويله
اخذت منك العزم والصبر والصيت
واخذت منك المرجلة والجميله
واخذت من اسمك نباي وتسميت
اسم الحمولة والفخذ والقبيلة
وعقبك ابنقلها لمن له تهقويت
يحيي نباي وسيرتك عند جيله
اذنت باسمك له وشاله وربيت
ورقيت به مرقا ياكود تحويله
اسست بنيانه بحرص وتوصيت
في طاعة الله والعلوم الجزيله
هذا جوابي ياسعد يومك ابديت
والهرج يكفي عن كثيره قليلة
يامحزمي يا مسندي لـِ تراكيت
انته واخوك سيوف هند صقيله


لـِ تاه راي الناس فيكم تقديت
مثل الجدي مافيه نجم بديله
انا هقيت اني مع الوقت سجيت
اثر الحزن جرحي بجوفي يكيلة
ميل على متني وأنا ماتشاليت
الله كريم يقعد الوقت ميله
وصلاة ربي كل ماصبحت وامسيت
في كل وقت وكل فرض ونفيله
على النبي اعداد من حج بالبيت
واعداد ماهل المطر من مخيله

عبدالمحسن بن محمد القباني
ضرماء

محمد القباني 06-24-2019 09:09 AM

<
الله يغفر له ويرحمه دائما ماتكون القصائد الرثائية صادقة في معانيها

وعسى العوض في راس من له تهقويت
يحيي نباي وسيرتي عند جيله

سمي ابوي وعزوتي لـِ تعزويت
الي ليَـ من انتحيت انتخي له

انشهد اني فيه همت وتشقويت
وارجي من الله له علوم جزيله

اللهم آمين
أبدعت يابومحمد كما هي عادتك وصح لسانك


الساعة الآن 01:49 PM.

Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by