أنا ببتدي بمسيّر النوّ من منشاه=ومن بعد ذكره باقترح زين الامثالي
أبختار قاف يعجب المستمع معناه=اصوغه من الياقوت والجوهر الغالي
وأصونه من المنقود وأنزّهه وأدراه=وأقزّه وأعدّل مايله وإيتهيّالي
أسوقه مع الطاروق لين أوصله مداه=كما سوق لانظا مع جراهيد الأسهالي
لامن جات مع دوّ قطوع خلا مضماه=يلحّونها الركّاب مع صحصح خالي
مع فِرجة سِرحان فيها يجرّ عواه=حداهم على سوق الركاب أشهب اللالي
ولانيب منهو لا ولى الشعر سلّ رِواه=يبي مايبون وقِلّة العرف غربالي
يحوسه ردي الحظ واقول ياعزّاه=وإلا من بغيت أنهاه معه الجدل طالي
لاشك الخطأ وشلون نرضاه لاشفناه=أناكيف برضى به وأنا أشوفه قبالي
وأقول إنتبه ياحايس الشعر لاتبلاه=موروث الشعوب اللي تناقله الاجيالي
وترى واجب إنّا ننصر الشعر ونحماه=من ناس تعبّث به وتاطاه بنعالي
هذا وإخذ مني يا فتى كلمة مهداه=نصيحة نوجهها لكم عبر الإرسالي
تمسّك بعروة خالقك واطلب النجاه=ترى كلمة الله ترفعك منزل عالي
ومن بعد الشهاده لاتكاسل عن الصلاه=تراها عمود الدين ياطيّب الفالي
وعلى المال مهما يختلف تاجب زكاه=وزكاتك لنفسك صاع عن نقص الأعمالي
وترى الصوم رابع ركن والصوم هو لله=صم شهر رمضان وأتبعه ستّ شوالي
وترى الحج ركن لاقدرته فلا تنساه=عسى تدركه من قبل قصّاف الآجالي
أركان الإسلام اللي عليها ثبت مبناه=شِمخ صرحها من ليل الإسراء ولازالي
عسى الله يعزّ الدين ويعزّ من وآلاه=والأشرار ربي مايبقّي لهم تالي
وعندي بعد ياطيّب الفال لك وصاه=وصاةثمينة ماتقدّر بالاموالي
أوصّيك في ربعة هل المعروف واهل الجاه=هل المدح والناموس ذربين الأفعالي
إلا من بدالك لازم عندهم تلقاه=جمال التخوت اللي يشيلون الأثقالي
وحذور الردي لو إنك في الضيق لاتنخاه=لو حدّك زمانك لاتحطّه على البالي
لاترجيه كانه حي وإن مات لاتنعاه=عن قربه تبعّد لو رفيق لك موالي
وإلا رحت منّه فإحمد الله على فرقاه=ترى معك أمانه لا تحزّم بالأنذالي
ترى الطيب جبل عالي كايد مرقاه=ولاهوب ياصل قمّته كل رجّالي
يذبه غلام تكسب الطايله يمناه=عريب المجاني طيّب العم والخالي
طليق الحجاج اللي هزال النضى تنصاه=يرحّب بها لاجات من البعد هزّالي
ومن عاملك بالطيب بالسوء لاتجزاه=وفي ردّ الجميل أشره على بعض الأزوالي
لاعاملته بمعروف صدّ وعطى قفاه=نسى كل معروفك وطيبك بالأجمالي
عسى مايجي في المجتمع مثله وشرواه=لافي وقتنا القادم ولا وقتنا الحالي
أنا أشره وأنا مالي سبيل على من تاه=ولانيب مسئول عن الشدّ لامالي
ونهاية كلامي بأطيب المسك ختّمناه=وأفكر عسى مافيه للنقد مدخالي
وأصلّي عدد ما أنشى سحاب ونثّر ماه=على المصطفى شفيعنا يوم الأهوالي

وعندي بعد ياطيّـب الفـال لـك وصـاه|*****وصاةثميـنـة ماتـقـدّر بـالامـوالـي

[]

اخوي حد الرهيف صح بدنك أشكرك على مرورك

عديل الروح

عديل الروح
صح لسان الشاعر رشيد بن مساعد
وسلمت يدك على المشاركة الجميلة
تحياتي وتقديري لك