يقول من قامت هواجيسة تجول=واختارمن زين البيوت سمانها
تدق في صدره كما دقة طبول=ولجزالها فتّحتنا بيبانها
لامن بغيت القاف مادونه قفول=وترى المثايل جزلها سلطانها
واللي مزعلني وانا رجل زعول=كلمة ظريف ماخذا حسبانها
ولاشفت بعض الميل ما أصبر بالميول=لاكان يمي ماكِتب عنوانها
أخاف قوله يسمعه بعض الخبول=ناس تحب التايهه وإعلانها
الإسم ثابت مستحيل انه يزول=دام العرب مكه تطوف أركانها
ياسعد بن ثلاب ياشبل الشبول=جدك بناها وتهدم بنيانها
الرجل ينظر مخرجه قبل الدخول=راجع إمورك قبل فوت أوانها
رنيه لغيرك لاتجيب أقصى الاصول=رنيه لناس طوروا عمرانها
لوجيتهم عدوك منها بالمطول=وينك ودار مِرمس هجرانها
منها ترى الجدّان قرّبوا الزمول=وشالوا على عِرب وساع أزغانها
وراحوا مع البيداء وسيعات الخلول=وخلوا جوانب ديرتك واوثانها
يوم زبنتهم زعب في ذيك الحلول=خوف من الظالم على ميلانها
جو من جبال الحجز نِكال إهزول=ولاذت بقوم نسّمت هزلانها
مع الزبين أستجنبوا فرس وذلول=وخاب الشريف الهاشمي ديّانها
يتلون ابن قبان جمّاع الشمول=زيزوم قوم تتبعه سلفانها
مثل المزون اللي بردها له ثعول=على الغويبه نثّرت غدرانها
ماخالها شلف على قِب تشول=وعلط الفتايل شابك حفّانها
في كل وادي جددوا كرّه وظول=لين القرايا عمّقوا سيسانها
وجدّك نزل في الغيل مختلف الحقول=وصرتوا سلاطين البلد عمّانها
مع لاد بن قبان حامين التلول=ربع تقلّد في الحروب أكفانها
يرسي بهم غرس شماريخه تدول=كبار فروعه وافيه عسبانها
لاطبّه المشّاي مايلبس نعول=كن البحور تروج في حيضانها
ياكل جناها الضيف والجار الخجول=مابنّيت من دونها جدرانها
جتهم اطغات الترك من فوق البغول=ترطن مزايكها على خيلانها
يتلون باشتهم على غير محصول=ويقول سِحمه وينهي ديرانها
وعدابهم كل أبلج قرم صمول=وخلّوا جثايا الترك كن نطلانها
نطلان خشب خامد عقب المحول=عشّت بهم سحم الضّرا عيلانها
حنّا سهول إن قامت العالم تصول=قوم على الأعداء تسوق أضعانها
كم واحد من حربهم راح معلول=تزحف على الموت الحمر غلمانها
لاجاء نهار فيه روغات العقول=كم فارس أخلوه من حجبانها
وكم خفرة لبست هداميل الهمول=عاقوا بعلها وايتموا ورعانها
وسبيع لاطالوا بطولتهم نطول=ناس تردّ الشره عن حقّانها
يستاهلون المدح ماضين الفعول=كم هجمة قد روّعوا رعيانها
يرعى بهم وقت المخافة كل شول=ترتع بطرّاف الخطر قطعانها
وإلا اعتلوا قِحص الرّمك شهب الذيول=يرمون شيخ القوم في ميدانها
وإختامها صلوا على طه الرسول=ماغرّد القمري بخضر أغصانها
شفيعنا في الآخره من كل هول=لاقرّبت الاعمال من ميزانها

صح لسانك يالشاعر رشيد بن مساعد ولا يهون الشاعر سعد بن ثلاب
تحياتي لك عديل الروح