مــن لايعـزك

حـي يوريك المذلـة وشاريــة
لا تنتظر يسقيك لاجيت ضامي

ومن لا يعزك لا تعـزه وتغليـة
شد الرحال وخل بيت الهدامي

عز الكرامة لو لها العمر تفنيـة
ومن لا إعتلت نفسه فعمره عدامي

الناس أنواع وبها العاقل يتيــه
أحـدٍ بفعلـه طاب وأحـدٍ يلامـي

وأحد تصانيف المذلـه تباريـه
متوارثـه ما بين خال وعمامـي

الساس جذاب ٍ ولو كنت نافيـه
لا بد ما يظهر ويصدق كلامـي

برقت أنا بالوقت وقابلت لي وجيه
مختلفـة ٍ ما بين سامـي حامـي

منهـم أصيل طيبات ٍ مجانيــه
الوجـه واحـد بالرّخـا والزحامـي

صديق عز ولا تضايقت تايتـه
أو هـو يجي لك لاتضايقت حامـي

قوله على فعله ولا شك حاويه
من القراح أصفى إذا صرت ضامـي

فـزاع نفـاع ٍعلـى منـت هاقيـه
هذا السفـر للعين وقـت الظلامـي

ومنهم وضيع ٍ كـل ماقلت هو فيـه
بالقول زين وفـي فعالـه جهامـي

لا شاف منك مصلحه فأنت غاليه
وإليا قضـى ماراد جنـب وشامـي

وأبنصح اللي كلمة الحق ترضيـه
ترى العمـر تاليـه مترين خامـي

إغنـم شبابك يافتـى قبل ياتيـه
مـن يهدم اللذات ويفنـي العظامـي

ومن لا كسب قولت نعم في مباديه
لا مـن كبـر ما فاز بأي إحترامـي

ومن يعمل المعروف يلقى حسانيه
يجنـي ثمـر يمناه عنـد الكرامـي

هذى أبياتي جات قصدي أجاريـه
بيـت ٍحكيم صغـت منـه إلهامـي

لإبن السديري ياعسى الله يجزيـه
بجنــة الفردوس خيـر المقامـي



الشاعر / محمــد العجــمــي
( الذيـب )