ياللي تشوفون محبوبي وش أحوالـه=أنا اشهد انه برى حالـي وعذبنـي
ياابعد داره عن عيونـي ومنزالـه=لكن شوقي علـى لامـاه يجذبنـي
عساه ماطاع فـي لامـاي عذالـه=هذا البلا كـان صدقهـم وكذبنـي
وهو يدري انه دواء قلبي وسلالـه=ماطعت منهو على حبـه يعذربنـي
أبو وسـاعٍ برمـش العيـن قتالـه=يومه رمى وكّد الرميـه وصوبنـي
ادقاق جسمه يسولف لي عن جلاله=واليا تذكرت خصره قلت وآغبنـي
وإذا تنثّـر علـى المتنيـن شلالـه=ماكنـه الا علـى كبـدي يشذّبنـي
اعانده واستفـزه واخلـف اقوالـه=لاصار في هرجته قصده يجربنـي
وإذا تنرفز وصارت حالتـه حالـه=يقول ( دبّه ) ياذاك أنـه يعاتبنـي
ظبيٍ مذيّر طبع يجفل مـن ظلالـه=هو ليه بالصـد والجفـوا يعاقبنـي
اقفى وانا اشوف قلبي قـام يبرالـه=وناديت بالصوت لكـن مايجاوبنـي
ولا ارخصت نفسي وخليته على فاله=لكن بعده عـن عيونـي مشيبنـي
ياللي تجونه امانه معكـم ارسالـه=قولو ترى الوضع هذا ما يناسبنـي
وقولوله اني على رجواه ووصالـه=مادام صرح الغلا في خافقي مبنـي
وقولوله أني إذا مريـت فـي بالـه=صدقت في عشرتي لـه لا يكذبنـي