يالله ياللي بيدك الـعزّ والـجاه=ياللي لخلاّت المخاليق رافي
يا من خلل عبدك إليا بان ترفاه=ياعالم ٍ غاية خفا كل خافي
ألطف بـحال اللي تبهذل بدنياه=وداج بجميع أنحا النحايا وطافي
يطـرد ورا حظٍّ عليك أنت مشكاه=لا شك شاف من الزمان إختلافي
من كثر ماله ساروا الناس برضـاه=ولو كان ناقص قالوا النـاس وافي
ومن قل ما بيده ترى الناس تشناه=لو كان يسقيهم عسل قنط صافي
فالمال كم ساس ٍ طمان ٍ وعلاه=والفقر كم حطّم روابع سنافي
لا شك ما للعبد عن حكم مولاه=من خير ولا شرّ والربّ كافي
ما كتب للمخلوق لا بد يلقاه=أمّا هزايم شرّ ولا عوافي