قالـوا كـذا مبسـم هيـا قلـت لا لا=بين البروق وبين مبسـم هيـا فـرق
ويالله بـنـوٍ مـدلـهـم الـخـيـالا=طافح ربابه مثل شرد المهـا الـزرق
لا جـا علـى البكريـن بنـا الحـلالا=ولاعاد لا يفصل رعدها عـن البـرق
يسقي غروسٍ عقـب ماهـي همـالا=وحط ( الحريق ) ديار الاجواد له طرق
يسقـي نعـامٍ ثـم يـمـلا الهـيـالا=ويصبح حمامه ساجعٍ يلعـب الـورق
جرّيت انا صـوت الهـوى باحتمـالا=في وسط بستانٍ سقـاه اربـعٍ فـرق
طبّيـت مـع فـرعٍ جديـد الحـبـالا=وظهرت مع فرعٍ تناوح بـه الـورق
روشن ( هيا ) لـه فرجتيـنٍ شمـالا=وبابٍ على القبله وبابٍ على الشـرق
ومبسم ( هيا ) لـه بالظـلام اشتعـالا=ما بين ضحكتها ونـور القمـر فـرق
بـرقٍ تـلالا بأمـر عـز الـجـلالا=واثره جبين صويحبي واحسبه بـرق
يا شبه صفـراً طـار عنهـا الجـلالا=طويلة السمحوق تنزح عـن الـدرق
له ربعه احلـى مـن حليـب الجـزالا=واحلى من السكر الى جا من الشـرق
حنّيـت انـا حنّـة هزيـل الجـمـالا=ينقض ردي الخيل قد حسـه الفـرق
ويـا قلّتـةٍ فـي عاليـات الجـبـالا=ماها قراح ميـر مـن دونهـا غـرق
مـا عـاد للصبيـان فيهـا احتمـالا=من كود مرقاها يديهـم غـدن طـرق
قالوا تتوب مـن الهـوى قلـت لا لا=الا ان تتوب رماح علوى عن الـزرق
قالوا تتـوب مـن الهـوى قلـت لالا=الا ان يتوبون الحناشل عـن السـرق
قالوا تتوب عـن الهـوى قلـت لالا=الا ان تتوب الشمس عن مطلع الشرق