هذه قصيدة معبرة من شاعر مجهول
ألا ياليل سلم لي عليها=وقبل لي بعد راحة يديها
عساها دوم في عز ومعزه=جميع الخلق عندي تفتديها
لها عندي غلا ماهوب عادي=أبيع الكون كله وأشتريها
وإذا ماشفتها فاليوم كني=مضيع حاجة والنفس فيها
يمر اليوم كله دون واهس=ولا ارقد دون رجلي ماتجيها
وإذا تونس ولو مثقال ذره=لو العيشة بيديني ما أهتنيها
غلاها غير عن عشق العذارى=عظيم الحب من جوفي إليها
زعلها عند مغليها جنايه=ولا افرح لين أجيها وارتضيها
أجيها وانحني لو هي جليسه=وأقبل راسها مع وجنتيها
وأحس براحة تكسى ضلوعي=تسابقني المشاعر وابتديها
ألا ياناشد عنها هي أمي=ألا يالله ترحم والديها
والا يالله طول في بقاها=ورد النار عن واطي اقدميها
عساني دوم أمشي في رضاها=رضاها غاية ماننتهيها
يقوله واحد من قلب عبر=ماهي هرجة لسان مبتليها
لنا في سيرة المبعوث مرجع=ودرس وموعظه ياسامعيها
يقول أمك وثم أمك وأمك=ورضات الله في الدنيا لديها
وصلى الله على خير البريه=عدد من طاف في مكه عليها
مع أجمل تحية من اخوكم
عديل الروح