ياالله يااللي تسجد النـاس لرضـاه=ياوامر ٍ خلقـه علـى حـج بيتـه
تفرج لمن سده على الناس ما ابداه=راضي على مقسومك اللي عطيتـه
من شي يسل الحال والجسم يبـراه=والناس مايشفونـه ان مـا شفيتـه
قلت آه واجرحـاه مـن علتـي آه=وان حملوني حمـل غـي ٍ قويتـه
قالوا سفا بالحال ويش اللي اغـواه=قلت آه ويش المنكر اللـي وطيتـه
قالوا جهلت وبـان علمـك لمنهـاه=قلـت اه علمـي يامـلا ماكميتـه
قالوا طلبنـا لـك مـن الله معافـاه=قلت آه وحدتـه وعفـوه رجيتـه
قالوا هله واحباب عينـه نصحنـاه=قلـت آه هــذا واردٍ مابغيـتـه
قالوا ندور لك من البيـض حليـاه=قلت آه لو غيـره بكفـي رميتـه
قالوا نشاش العُـود مالـك بلامـاه=قلت آه عُود المـوز بيـدي لويتـه
قالوا تـزوج كـود تدلـه وتنسـاه=قلت آه لو خذت اربـع ٍ مانسيتـه
قالوا من اقصى الناس وين انت وياه=قلت آه ما انسى يوم جاني وجيتـه
قالـوا نشوفـه عنـد هـذا وهـذاه=قلت آه عمره ماعقب حـج بيتـه
قالـوا عليـل وناقـل ٍ داه بـرداه=قلت آه باقرابـي وروحـي فديتـه
قالـوا نشيـر ولا نفـع ماحكينـاه=قلت آه هـراّج النمايـم عصيتـه
قالوا كثـر شيبـك وقلبـك بعميـاه=قلـت آه لوقلبـي غريـر ٍ نهيتـه
مطـاوع ٍ قلبـي بعجفـاه وقـداه=والى عطى منهاج درب ٍ عطيتـه
ياناس خلـوا كـل وادي ومجـراه=قلتـوا كثيـر وقولكـم مـا لقيتـه
الشاعر / عبدالله بن سبيل