ما دام حبـك خالطـه شـك .. مـا ابيـه
طاح العتب .. مـا هيـب لحيـة مشاريـه
خل الكلام .. و حبـل الأعـذار طـوّه !!
ما راح اقول أشلون .. او كيف .. او ليه ؟
ترى السـؤال بـدون أجابـه مشـوّه !!
العذر مااات .. و مـات همـه و رااعيـه
و الجرح جف .. و جف غيمه و نـوّه !!
صاحبك ضاع الهرج مـن بيـن أشافيـه
ما كنّـه اللـي كـان قبلـك .. مفـوّه !!
ليـه أنصـدم ؟ و تخـون قلبـي هقاويـه
و يطيح نجمي .. و أنخذل فـي علـوّه !!
أصدق مع الواحـد و احبـه .. و اثاريـه
طـوول الليالـي معتبـرنـي عــدوّه !!
لا يـا بعدهـم .. و أول الغيـث تالـيـه
و أنت اتعرف قلبي .. و خيره و سـوّه !!
يمكن لو انك قلت غلطـان .. قلـت أيـه
مير البلا انك قلـت .. ناقـص مـرّوه !!
قل لي متى شحيـت فـي شـي ٍ أعطيـه
و قل لي متى صارت محبتـك .. خـوّه !!
يصعـب علـى الرجـال يثبـت مبـاديـه
و ان كانه اثبت .. كيف يثبـت سمـوّه !!
الله يبيحـك عـن خـطـاك و تمـاديـه
و يبيـح قلبـك عـن خطـاه و غلـوّه !!
ما دام حبـك خالطـه شـك .. مـا ابيـه
حب العتب و الشك .. ما اعيش جـوّه !!
ما كنّـي اللـي كـل مـا تلمـس ايديـه
يغمـرك بأحسـاس و حنـان الأبــوّه !!
و ما كنـي اللـي كـل مـا مـر طاريـه
ضج الفضا باسمـه .. و عكـر هـدوّه !!
يـا مرحبـا بالجـرح .. و الله يحيـيـه
لا صار مـن يمنـاك و الجـرح تـوّه !!
بعض الجروح ان صابـت القلـب تنهيـه
و بعض الجروح .. تزوّد القلـب قـوّه !!
الله كتب .. و القـوس فـي كـف باريـه
و اللي تشوفه يا أبيض الوجه .. سـوّه !!