يم أبومبارك توجهنا شمالي=في لزومه عندنا الفرجة قصيره
الفجوج نسجها لوهي طوالي=ما نحسّب للمشاوير الخطيره
صبح يوم الأحد شدينا الرحالي=سارحين ٍ من بلد صقر الجزيره
والمساء في دار شهمين الرجالي=الصباح اللي حسانيهم كثيره
والعشا عند الشلي ريف الهزالي=عند بن صديان فيصل كثر خيره
والنهاية عند مدغوش العيالي=ابن نويف جعل يفداه العثيره
وربعهم الأخيار وافين الخصالي=كاسبين المدح أهـل شيمة وغـيره
من بني قبان منفدة الحلالي=لابة ٍ ياسعد منهم له عشيره
السهول مطوّعة من كان عالي=يلطمون الشره لاجنّب مسـيره
لاحصل يوم ٍ يطول به القتالي=خصمهم من ضربهم يشمت مشيره
في نهار الضيق ينجون التوالي=كم عدو ٍ في اللقاء حاسوا مريره
كنّهم في الهوش صايكة الجمالي=الرجال اللي يصدون المغيره
وينفدون المال في عسر الليالي=في زمان الشح والعالم فقيره
ولانسيت سبيع مروين السلالي=نصرة المضهود في يوم الكسيره
كم رعوا في خايع ٍ قفر ٍ وخالي=مانزل من خوف قيمـان شريره
قافر ٍ ماديج به من يوم سالي=زايف ٍ عشبه يغرد فيه طيره
في عثاميره يسجون المتالي=ولا رهجهم خوف لو جاهم نذيـره
من غزاهم سايقه زود الهبالي=الهزيمة والخسارة هي مصيرة
قلته ولا أقول حزنا بالكمالي=كل ٍ لكسب الوفاء يشعب بعيره
الصحيح يعد والواقع يقالي=القبايل وافية في كل ديره
قلت من زين المثايل ماطرالي=ولابغيت الشعر قافي ماستعـيره
تم قولي ياكريمين السبالي=والختم نرجي من الله الستيره
ياكريم ٍ كل خلقه له تسالي=عالم ٍ ماكان نعلن والسريره
يالعزيز المقتدر ياذا الجلالي=ربنا اللي مالنا معبود غـيره