ياهلا يامرحبا بالوافدين=عد ماتذرى الذواري من رمال
وعد مايطلع من المنشى غظين=وما يهملل من مقاديم الخيال
وعد ماطافو بمكة محرمين=ومارفع فيها من أصوات إبتهال
شرفونا يوم جونا زايرين=عقب طيلت وقت وأعوام طوال
ولا نسيناهم على طول السنين=هم لنا وانا لهم في كل حال
ذكرهم بقلوبنا لو نازحين=الأصل واحد مايبي شك وجدال
الأصل واحد من محرك منتمين=من بني قبان مروين السلال
من سهول تودع القاسي يلين=يلطمون الشره لمن الشره عال
ياردون الموت ورد المعطشين=من وقف بنحورهم صابه اجفال
في اللقى دايم مواقفهم تبين=الجمال اللي يشيلون الثقال
لازبنهم مجرم مطلوب دين=كنه في راس الطويل من التلال
يبتجح ويصير عنده نوم زين=آمن في ضفهم مرتاح بال
ويذبحون الحيل والكبش السمين=وينفدون المال في عسر الليال
عزوتي لامنه صار اللغو شين=لاحصل يوم عسامه له ضلال
وغيرهم ماأهضم حق الآخرين=كل يطلع فيه حقه من رجال
دون احقوقهم القبايل واقفين=كل منهم يمزع الماء بالحبال
ذا كلامي واشرح العلم اليقين=ولانقول القول زيف واحتيال
ولا اقترحت أتعب على الجزل الثمين=خوف فيه يصير للناقد مجال
والحكم في رايكم يالسامعين=إحكموا به ياكريمين السبال
وسامحوني واسلموا ياغانمين=وماصلح للمجتمع هو راس مال
وختمها صلوا على أشرف مرسلين=أمي قبره تشد له الرحال