يا عيوني فيك للعبره مواري = عزتي للمشتحن من دمع عينه
تسعة اشهر جاريه و الدمع جاري = ما بقى يا عين شيٍّ تذخرينه
لا درا حيٍّ ولا حيٍّ بداري = يدري اللي عز مكه و المدينه
يالله اشرح خاطري عقب الطواري = و ارحم اللي دايمٍ نفسه حزينه
مايبي منصب و لا سوقٍ تجاري = يطلب انك ترحمه وانك تعينه
قاله اللي ما دخل جوٍّ حضاري = تاركٍ القصر للي مهتوينه
ما يبي غير الصحاري و البراري = و النفود اللي بها للصيد عينه
في نفودٍ قفر ونقص الاثاري = فوق جيبٍ لا درج مثل السفينه
خبةٍ فيها الارانب و الحباري = عيشتي من دونها غبن وغبينه
و رملةٍ في صيهدٍ ماهي ذواري = و الغضا من عصر فيها حاطبينه
و الدلال الصفر مع بيض الغواري = نجرها في جنبها تسمع دنينه
و اخوياي ثنين و الثالث امباري = و هادي السايق عسا تسلم يمينه
يا حياة الشين يا دنيا العزاري = ليت عصر فاتني ترجع سنينه
اتركوني في الخلا حدب و صحاري = و الله اني قابلٍ زينه وشينه