يا زين شبتها صباح وعشيه=في فيضة ٍ ما طبها إلا مطرها
يوم إن ولد اللاش ما راح نيه=يتابع الكورة ويسمع خبرها
ولا دخل بعض الفياض العذيه=يوم إختلط نوارها مع زهرها
ولا قطع بعض الديار الخليه=ما همته سمر الليال وقشرها
يا رشيد أنا بقوم حجة ادعيه=يومك تعرف سلوم بدو وحضرها
يا راكب اللي شد فوقه حنيه=ما أفتر دالوبه بسهل ووعرها
ينحر ربوعي ملحقين الرديه=ذباحة الحايل بسرعة حذرها
تكررت منكم علينا خطيه=والصبر لا طوّل بكبد ٍ فجرها
لزمت بالترحيب أقصى تحيه=واللي رفع شمسه ونوّر قمرها
لي رغبة ٍ لجيّة الربع ليه=من يوم عيد الفطر لآخر شهرها
لا شك صارت نية ٍ دون نيه=ضاعت الفرصة علي وتخبرها

الصدى

لا هنت يا رجل ٍ بعث لي شكيه=أرسل بيوت ٍ من رصيده صخرها
مثايل ٍ فيها المعاني قويه=ما حافها اللي لا ولاها دمرها
على ونيت ٍ يقطع الجندليه=جرد الصحاري يوم حرك عبرها
يا مرسله كفيت من كل سيه=وسلمت من غبر الليال وكدرها
يا مكرم الضيفان رجل الحميه=مثلك إلا من شاف عجفا طمرها
كانك تشره يا بو ماضي عليه=رمعاتنا بعض الأمور تعسرها
ولا فيه نيه تعتبرها خفيه=كشف بطانتها وكشف ظهرها
وأنا أبشرح لك بيان القضيه=وقف بدرب القافلة من قهرها
ولو فيه رجال ٍ يخلي خويه=ثوّرت دالوب الغبار بكفرها
لا شك عندي للخوي مقدريه=وخوة بعض الأشخاص تعطي ثمرها
خاويت أبوفالح زبون الونيه=والطيّب أشري خوته ما خسرها
هو قايد الحملة زعيم السريه=خيّال سهلات الدروب ووعرها
بهلول هشهوش ٍ يمينه صخيه=ماهوب لا جمّع فلوسه ذخرها
في سفرة ٍ زالت هموم ٍ طريه=أناسة ٍ شيطانها ما خشرها
والمسلم العاقل يراقب وليه=لمن ألتمس نعمه من الله شكرها
لك الشره يا حامي الدوبليه=يا ريف أهل هجن ٍ شكت من جمرها
القلب يمك والهدف والنحيه=أنتم صبي العين قرة نظرها
يمناك في ذبح الهرافا جريه=كم حايل ٍ قدم الضيوف تعقرها
يفداك مثبور ٍ رموعه دنيه=هومات نفسه من العوالي ثبرها
ويفداك مفلول ٍ يشح بطليه=يمناه من كسب المراجل قصرها
ما فيه ذيك ولا حصل منه ذيه=ولو فاتته طول الدهر ما إعتبرها
هذا مردي وأبعثه لك هديه=بيوت ٍ ضمنها من الخطا مختبرها
بيوت ٍ لها في المجتمع قابليه=آرد مواردها وأغوص بحرها
أرهج بحور ٍ بالجواهر غنيه=وأجيب من غال الجواهر دررها