بسم الله الرحمن الرحيم
وهذه قصائد في القهوة لبعض شعراء سبيع وبعض كرامهم قال الشاعر الشيخ سعد بن قطنان راع رنية من شيوخ المراغين الزكور من سبيع بن عامر الغلباء
جر الفراش لنا وهات الدلالي
اربع مغاتير على النار تدنا
ترى حلاة النار دوم اشتعالي
وسوقه فناجيل عليهم من أدنا
فنجال اشقر مثل دم الغزالي
ليا نقص شي من الكيف زدنا
أتعب لها بالسوم لو كان غالي
لو كان زود بالثمن ما نشدنا
نشري لها المثلوث هو شف بالي
لو كان سوقه نازح عن بلدنا
وله أيضاً
قم يارويشد شب ضو المنارة
ثم هات من صوته يقود المسايير
نجر ليا حرك تزايد عبارة
يازين صوته بين عوج الدواوير
يامسوي الفنجال كثر بهاره
جلف ويتلنه ثمان مغاتير
حاذور يالصباب تثني مداره
الا على الي ينطحون المخاسير
احد ليا سير عرفنا وقاره
واحد ليا سير يدور التفاكير
كم واحد ناشي بليا خسارة
مصبر نفسه على البخل تصبير
هو يحسب انا ما نعرف الصقارة
يعد عمره من حساب المناعير
ياحبنا والله لجمع التجارة
لولا الحياء حنا نعرف المعاذير
وهذه قصيدة الشيخ عجران بن شرفي شيخ آل علي اهل العارض من سبيع الذي اشتهر بانه لا يثني الدلة ولا يذبح الماعز حيث قال في القهوة
يافهيد صك النجر يوحيك بتال
صكه كفاك الله جميع الاذايا
استدن نجر في الدهر يعول اعوال
اعوال سبع حاديته الضرايا
وعليه كيف لي من البن فنجال
جعل الرخوم ونسلها لك فدايا
وعده لحماي النوايب والاثقال
في الضيق لا من التقن المنايا
واللي يحزب زاد بيته ليا كال
وحط المعاني الطيبة له شرايا
واللي ليا رد البرا بين الاعمال
له عادة يرخص سمان العطايا
واللي يروي حربته بالتجيوال
لا رفعوا لقطيهن بالهوايا
وباقي العرب خله ولو كان زعال
هذار وبالمجلس كثير الحكايا
وهذه قصيدة الشاعر الفارس سلطان الادغم من الصمله في القهوة
ياسليم شب الضو مالك مهانه
يجي لها ضوح يقود السراتي
واشعل بفنجال وزين زيانه
واحذر من الاحراق والا النياتي
ريح وطعم راعيه ينشع لسانه
اطرف حمر لونه كما دم شاتي
عده على اللي لا هرج لك تكانه
قليل هرج وبالملاقا زناتي
يفداك من هو عايش بالذهانه
ويديه لحبال الردى قاضباتي
طاري عليه الجود تالي زمانه
زل الشباب وهو على ذا السواتي
عند الجماعة مهلقم في لسانه
وهو لايحذف ولا يجيب الحصاتي
وهذه قصيدة الشاعر عبدالهادي بن راجــــــــس العامري السبيعي في القهوة
أوي فنجال يصبه مسويه
وحنا سوالفنا على جال ضوه
في ربعة والبيت يرفع بقارية
بيت على ما قيل يرفع بقوة
تالي نهاره وأوله دايج فيه
قم سو فنجال المطاليق سوه
أحذف لها رمث إكبار مثانيه
تو الجماعة نازلين بجوه
والماء تخير من زلاله وصافيه
من مزنه ماخاشر العج نوه
وحمس ولا تحرق وحاذور تنييه
ما بين فرُغها وما بين توه
واجغف لها من طيب الهيل غاليه
والزعفران بكثرة الهيل شوه
صبه على اللي طيبات معانيه
واختص منهو بالمراجل تفوه
اللي يعنز لك إلى رحت ناصيه
يسلم ولا يسلم رديً المروه
وهذه قصيدة الشاعر محسن بن علي بن جغثم القريشي السبيعي في القهوة
ياعيد شب النار قم سو قم سو
وسو فنجال وزين قنادة
هات الدلال ووسع حفرة الضو
شب بحطب سمر ولوع عراده
خل النشاما لاتلافوا لك وجو
يلقون من جدك مراسيم عاده
احمس من البن الخضر لا تلافوا
وللعود حط شداد والاوساده
وبهارها هيل من الباخره تو
توه منزل من سنابيك ساده
مع البحر ملفاه والا مع الجو
مع زعفرانه كبر رجل الجراده
حتى يجي فنجالها لا تقهووا
مثل صفار البيض في كاس ساده
فان كان هم عجلين فقل تغدوا
والا العشاء مضمون مثل العباده
حتى لاراحوا لهلهم وقفوا
كل يعد الطيب على انفراده
منقول وانتم سالمون وغانمون والسلام