باسم الكريم المعتلي رازق الطير=أبابتدي واختار من جزل الأشعار
أبقترح قاف يشوق الجماهير=وفي طيّب الانتاج مانيب محتار
أصمم المعنى بحكمة وتفكير=وأشيّده وابنيه من صمّ الاحجار
عدٍّ رسين لاقطعنّ القواطير=هدّاج تيماء لازٍحم بالدّلي فار
وردَت بنات الفكر خِلجٍ محاشير=وتجاولت في الصدر والصدر محشار
واسوقها سبرات سوق المناعير=عيرات لانظا مع جراهيد الاقفار
وغيري فحولٍ تصخر الشعر تصخير=تجنى الدرر من عمق غبّات الابحار
أعد نفسي شاعر معهم اصغير=وليسَ حبالي من جبا العدّ قِصّار
لامن وردت اسقي ضماياي من البير=أشرب بدلوي من طويلات الابيار
هذا وجينا من بعيد مسايير=في تلبية دعوة طويلين الاشبار
أولاد نويف مكرمين الخطاطير=كسّابة الطولة وسيعين الانظار
قبابنة صلبين الارياء مغاوير=نفخر بسمعتهم حميدين لاذكار
في دار شيخ يحتمل للمخاسير=صباح الاحمد مكرم الضيف والجار
دار الكرم دار الرخى منبع الخير=ملجأ الضعيف اللي عليه الزمن جار
دارٍ صغير وله مكانه وتقدير=حامينه الصباح من كل غدّار
قلته وانا ربعي تهزّ الطوابير=أهل مراكيض على قِحص الامهار
لهم على جمع المعادين تأثير=يسقون راعي الزوم كيسان الامرار
سهولٍ تصدّ الشره لاجنّب السير=بالسيف ينحونة على غير يختار
يطوّعون اللي براسه صعاطير=راعي الخطا يلوون له قيد واهجار
خيّالهم في مستوى سالم الزير=لاجاء نهار الهوش يِهدون الاعمار
وان حلّ ضرب عند تالي المظاهير=مركاضهم يِبعد إلحاهم عن العار
تشبع به العرجاء وعِكف المناقير=في ساعة فيها الشياطين حضّار
ويكرّمون الضيف لوهم معاسير=لو في زمان ترتفع فيه الاسعار
لامن أقبلنّ العوص مثل السنانير=ولِفت عليهم عقب الإصلاف حِسّار
رِكّابها ترتاح عقب المشاوير=في ارباع ذربين اليماني هل الكار
أول كرامتهم ادلال مباهير=وطِلق الحجاج ومرحبا قبل الاخبار
مع قرّح يشرونها بالدنانير=لو حدّها البياع بالفين دينار
وفابناء السهول أكرر المدح تكرير=ولانيب نصّاب ولانيب مكّار
في مدحهم ماقلت كذب وتزوير=بامدح موطّين الصَعَب سرّ واجهار
اولنسى سبيع متيّهين المعاشير=اللي لهم في الطيب مورد ومصدار
رعّاية الاقفار وقت المخاضير=ترتع بهم في الخوف حَسكات الاوبار
لاخضّرت سحب الوسوم المباكير=يرعونها في الخوف لو جاهم انذار
ولاثار عجّ معسكرات المسامير=حريبهم من ضربهم راح منهار
تفرّ عنهم خيل الاعداء مدابير=خيّالهم في الهوش في راسه اصطار
لامن اعتلوا فوق الاصايل مشاهير=زحول الرجال اللي يدوسون الاخطار
جمال التخوت اللي تشيل القناطير=مواقف الغلبا عظيمات وكبار
ولا اقول حزنا بالمراجل عن الغير=الكل دون احماه ماراح له ثار
من دون واجبهم اطوال الاشابير=كل أبلجٍ شهمٍ على حقه يغار
هذا ودمتم يالوجيه المسافير=أنهيت ماعبّرت من عمق الافكار
وابغى السموحة كان في القول تقصير=ماكل من دشّ البحر جاب محّار
وصلاة ربي عدّ رمل العثامير=على نبيّ خٍصّ بالوحي في الغار
ماهمللت دِهم المزون المزابير=وماغرّد القمري على خِضر الاشجار