إخواني وأخواتي دعواتكم له فلا يحتاج إلا للدعاء

ودّع عياله وانسجن في ديونه=مسكين لا حيلة ولا عاد يحتال
قضبان سجنه حال دوني ودونه=حطوا قفل وأبواب وقيود وأغلال
والهم يجرح والليالي تخونه=والوقت مر وغدرته تقتل رجال
من صغر سنه والمكارم فنونه=تشهد له الأفعال من قبل الأقوال
شايب ورأس المال ناس ٍ يجونه=وجهال خلق الله تلاعب بالأموال
كيف العزيز يذوق طعم المهونه=ويلعب بذيله كل مجرم ومحتال
وين الذي هم للشنب يفتلونه=وين الرجال اللي بها تضرب أمثال
وقت ٍ تغير فيه شكله ولونه=يالله دخيلك وش بقى شي ينقال
يالله سألتك يا إلهي معونه=أنت الفرج لا ضاقت أحوال وأحوال
ما له سواك يا عالم ٍ في شئونه=عبدك ضعيف الحال ما راق له بال
ربي إلهي لا تخيّب ظنونه=رحماك يا رحمن دام الدهر مال

محمد القباني