يا من لعينٍ في محاجيرها شوك=والقلب به عن لذة النوم دكاك
لا دك في قلبي من الهم داكوك=جاوبت طربان الحمايم والأدياك
عزي لحالك يا عزيز وأنا أبوك=كان الزمان اللي وطاني توطاك
أمشي وكني يا عزيز بتابوك=في حبس جبارٍ تحت حكم الأتراك
على عشيرٍ دونه الباب مصكوك=ما غير أمرّه وأتعداه مناك
بابٍ وراه حروس ما هو بمفكوك=ومبرزٍ دونه مكاين وشباك
وبقيت أنا في حضرة الوقت مملوك=دولة زمانٍ بين جاك وتعداك
إفهم وصاتي ياعزيز وأنا بوك=دامك صغير وغاية العلم يقراك
تراه ما ينفعك خالك ولا أخوك=لا صار ما تقضي لزومك بيمناك
وربعك إلى بان الخلل فيك عافوك=أقرب قريبٍ لك من الناس يشناك
إن كثر مالك صدقوا لك وطاعوك=وإن قل ما بيديك شانت سجاياك
لو تطلب الماء عندهم كان ما أسقوك=أبعد مزارك عن وطنهم ومرباك
إن جاد حظك صدقوا لك وزاروك=وإن بار كلٍ ما يبي غير فرقاك
وإلى اعترض لك من صروف النيا صوك=كلٍ تبرا منك ما هوب وإياك
وهراجة المجلس إلى جيت وروك=منازل تطرب نظيرك بدنياك
وإلى قضوا منك اللوازم وخلوك=تفرقوا وأنت احتمل كل ما جاك
كنك سراج البيت للنور شبوك=وإلى قضى الوارد حدا الربع طفاك
وإلا كما ليمونة الحمض مصوك=وإلى قضى منه الطعم فرغوا لذاك
واللي يجي من رفقته ريب وشكوك=إحذر عنه لياك تصدق بمسراك
وإلى جفوك أهل الوطن واستخفوك=قلّع غريسك منه وإهدم ركاياك
تراك لو تنجع على الرجل صعلوك=أحسن من اللي تلتجي له وياطاك
عطهم وضيايفهم إلى منهم جوك=وغلّق ضميرك لا تعلم بقصياك
وخدمتك شيخٍ كنك العبد مملوك=يامرك فيما يشتهي وأنت ينهاك
إعرف تراك مبرقعٍ منه مشبوك=حدّرك في حبل المهالك ولا أرقاك
وإصحا لخلان الرخا لو تغالوك=اعرف ترى أطيبهم إلى احتجت يجفاك
كنك خوي مقيط دهووك وأغووك=وحقك عطاك رشاك وأقفى وخلاك
وإحذر عن العيله ترى الحق مدروك=مثل العمل يدرك ما منه فكاك
وإن كان عدوانك على الضيق حدوك=إخصم طلابتهم بعجفاك وقداك
وإن كانهم لمشرّف الحق ماشوك=ناظر مطاليع الفرج قبل مبداك
وإن طوعوا شيطان الأنفس وهانوك=فاصبر على البلوى ودفنت رزاياك
زرهم تراك إلى توانيت زاروك=إما بديت بصاحب السو يبداك
ما دامهم ما طاوعوا لك وعرفوك=إضرب على الكايد إلى عمست أرياك
لو هذبوك من المصايب وضدوك=ما يذبحونك قبل تدني مناياك
واحلم عن الجاهل ترى الحلم مبروك=وقم للضعيف اللي من الضيم ينخاك
وادمح خطا جيران بيتك إلى أوذوك=ترى القصير وحرمة الجار بحماك
عطهم رواتب حقهم لو تناسوك=في كل ما يصلح لدينك ودنياك
وقم للضيوف إلى عنوا لك وضافوك=أغلى كرامتهم حجاجك وبشراك
وإعرف ترى ما لك من الضيف مشروك=لولاه يطلب حاجته فيك ما جاك
وقم للرجال إن ريعوا لك وحبوك=واحشم خويك وأكرمه عند ملفاك
وإلى اعتبرت بسيرة الناس كفوك=ما كثر من شي تعبته وعناك
ولا تبات بهم دنياك مضنوك=ما طاب لك ما دام لك وإفتهم ذاك
لو يطلبون إخفايك الناس ما أخفوك=والرجل مثل النجم في كل الأفلاك
وصلاة ربي عد الأوراق والشوك=ما ناض براق وما هل سفاك
على الذي ما فيه ريب ولا شكوك=محمد مادك بالقلب دكاك

البارحة ما ذاقت النوم عيني = همّ بتنجيم بفكر بهوجاس
وأصبحت من غبّ السهر والونيني = جسم برمّة مجرم عند حبّاس
صبرت لين الصبر بيّح كنيني = ولا شفت لي من جملة الصبر نوماس
شابت عوارض لحيتي قبل حيني = وقنعت من عقب الفوايد بالإفلاس
دنياك هذي تفجع الغافليني = ترفع ذنب وتطمّن المتن والراس
تبدّلت هرج العرب بالرطيني = وقامت تجنّس لي على سبعة أجناس
رخص الحصان ورخصوا الطيبيني = وغلي الحمار وما إشتبه له من الناس
وقـام الـردي يدحـم بجنـب متينـي=وابن الحموله قام يمشي مـع السـاس
وقـلّ الرفيـق وقـلّـوا الغانميـنـي=وكثر الحسد وأهل النمايـم والأنجـاس
وشان الزمان وشـان وجـه الضمينـي=وتغيّـرت كـل الطبـايـع والألـبـاس
والمال صـار مـع المـره والدوينـي=والطيب راح وقطّعـت عنـه الأرمـاس
وخليـت كفـوف مدلّهيـن الحزيـنـي=واللي تورثّهم شعـر سـاق حسـاس
والذيـب جـاع وكـل ثـور بديـنـي=والحر برقع وأبـرق الريـش فـرّاس
وذلّ الجسور وكلّ حد السنيني=وتكشيف عرض الناس هو سهمة الناس
والمرجلـة نسخـت مـع المارتيـنـي=وتعوّضـوا عنهـا بخوصـه ومكنـاس
وصار الردي يحشـم مـع الحاضرينـي=والراس ديس وخدّم الحر أبـا الحـاس
وصار الصديق هـو العـدو البطينـي=يشرف عليك ويصبح الصبـح بـلاّس
وطرد الهوى بختـوا بـه المفلسينـي=شرّابـة المصفـاه طبّاخـة الـفـاس
وختـام قيـلـي أيـهـا السامعيـنـي=صلوا علـى المختـار ما هـل رجّـاس
والآل والأصـحــاب والتابعـيـنـي=عد النبات وعد حصحـاص الأطعـاس