طار الكرى من موق عيني وفرا=وفزيت من نومي طرا لي طواري
وأبديت من جاش الحشا ما تدرا=وأسهرت من حولي بكثر الهذاري
خط ٍ لفاني زاد قلبي بحرا=من شاكي ٍ ضيم النيا والعزاري
سر ياقلم واكتب على ما تورا=أزكى سلامي لإبن عمي مشاري
شيخ ٍ على درب الشجاعة مضرا=من لابة ٍ يوم الملاقا ضواري
يا ما سهرنا حاكم ٍ ما يطرا=واليوم دنيا ضاع فيها افتكاري
أشكي لمن يبكي له الجود طرا=ضرّاب هامات العدا ما يداري
يا حيف يا خطو الشجاع المضرا=في مصر مملوك ٍ لحمر العتاري
من الزاد غاد ٍ له سنام ٍ وسرا=من الذل شبعان ومن العز عاري
وش عاد لو تلبس حرير ٍ يجرا=ومتوج ٍ تاج الذهب بالزراري
دنياك يابن العم هذي مغرا=ولا خير في دنيا توري النكاري
تسقيك حلو ثم تسقيك مرا=ولذاتها بين البرايا عواري
اكفخ بجنحان السعد لا تدرا=فالعمر ما ياقاه كثر المداري
ما في يد المخلوق نفع ٍ وضرا=وما قدر الباري على العبد جاري
واسلم وسلم لي على من تورا=واذكر لهم حالي وما كان جاري
إن سايلوا عني فحالي تسرا=قبقب شراع العز لو كنت داري
يوم ٍ إن كل ٍ من عميله تبرا=حطيت الأجرب لي عميل ٍ مباري
رميت عني برقع الذل برا=ولا خير فيمن لا يدوس المحاري
يبقا الفخر وأنا بقبري معرا=وأفعال تركي مثل شمس النهاري
نعم الرفيق إلى سطا ثم جرا=يودع مناعير النشاما حباري
واحصنت نجد ٍ عقب ما هي تطرا=مصيونة ٍ عن حر لفح المذاري
ونزلتها غصب ٍ بخير ٍ وشرا=وجمعت شمل ٍ بالقرايا وقاري
والشرع فيها قد مشا واستمرا=ويقرا بنا درس الضحى كل قاري
زال الهوى والغي عنها وفرا=ويقضي بها القاضي بليا مصاري
وإن سلت عن من قال لي لا تزرا=نجد ٍ غدت باب ٍ بليا سواري
ومن أمّن الجاني كفى ما تحرا=وتازي حريمه بالقرايا وقاري
وأجهدت في طلب العلا لين قرا=وطاب الكرى مع لابسات الخزاري
ومن غاص غباب البحر جاب درا=ويحمد مصابيح السرى كل ساري
وأنا أحمد الله جاب لي ما تحرا=وأذهب غبار الذل عني وطاري
والعمر ما يزداد مثقال ذرا=عمر الفتى والرزق في كف باري
وصلاة ربي عد ما خط بالرا=على النبي ما طاف بالبيت عاري

وإلى أن يحين لنا الموعد مع شاعر آخر تقبلوا تحياتي