منتديات القبابنة - عرض مشاركة واحدة

11:43 AM

سبحان من يرزق بتوع الملايين = الرازق اللي ما يخيب الرجا به
لي عم عنده معرض للصوالين = أموت وأعرف بس من وين جابه
واذا سألته قال بعت الدكاكين = مايدري اني ما هضمت الإجابه
الشاهد اني رحت له قبل يومين = في قصره العامر ودقيت بابه
قال أرحب أرحب عدد ورد البساتين = يا مرحبا باللي لفا يا هلابه
قلت البقا عد النفل والرياحين =يا شيخ شمل أهل الكرم والذرابه
قال أسلم الله يحفظك لي من العين = وآمر أوامر حضرتك مستجابه
قلت الصراحه طالب قرب غالين = ودي تزوجني كريمتك يابه
ثنى وقال أهلين والله وسهلين = والكون ترخص لجل عينك رقابه
لكن ترى عندي شروط وقوانين = قلت اشرط اشرط يا حبيب الغلابه
قال أولا مهر العروسه ثمانين = غير الرسوم وغير حق العصابه
والثانيه عمك يبي منك سبعين = رسم الأبوه والنسب والقرابه
وأم العروسه حقها منك ستين = عشانها ست الحسن والمهابه
وإخوانها كلن يبي منك خمسين = عدا ونقدا تندرج في حسابه
وخواتها الخمس عطهن من ثلاثين =عشان تتوثق عروق النسابه
وتجيب طقم عيار واحد وعشرين = وخاتم من الماس المصفى ترابه
واكياس متروسه كعوب وفساتين = ألوانها وأشكالها ما تشابه
وموتر بسواقه وفيلا بدورين =أثاثها من بطرته ينحكى به
واحجز لنا قاعه بقصر السلاطين = واحجز بها رقاصتين وربابه
هذي الشروط اللي على بالي الحين =وذكرني اللي ما حسبنا حسابه
قلت أذكر الله يا عدو المساكين = واستغفره لا يبتليك بعذابه
الظاهر انك منت عارف انا مين = انا لو أرقى فوق متن السحابه
ما جبت حتى نص درزن مواعين = واضحك بكيفك واعتبرها دعابه
شروطكم هذي شروط المجانين = شروطكم شغل ابتزاز ونهابه
شروطكم تقصم ظهور البعارين = شروطكم همن وغم وكآبه
شروطكم والله سيوف وسكاكين = تذبح بنات المجتمع مع شبابه
وين الرضا والعطف واليسر واللين = اللي ذكرها الله بمحكم كتابه
وين الصفات اللي أمرنا بها الدين =وين اختفى نهج النبي والصحابه
يا عم جعل اللي خلقنا من الطين = يرد عقلك من خطاه لصوابه
ويجعل نصيبي عند غيرك قل آمين = ويحسن عزا الصابر ويجزل ثوابه
قال انت لو فكرت تفكير صاحين = ما شفت في مجمل شروطي غرابه
حنا بعصر العولمه والمزايين = ما هوب عصر الفلسفه والخطابه
الناس تسعى للرتب والنياشين =وانت اهتمامك بالشعر والكتابه
والشعر ما ينفعك لو هو دواوين= ما دام جيبك مثل بيت الخرابه
يابوك لا تسمع كلام المصاخين = واسأل مجرب عاش في وسط غابه
قلت الله اكبر يا محرر فلسطين =من يسمعك يحسبك ذيب الذيابه
تراك شايب راس مالك ريالين = والبنت ما تسوى جناح ذبابه
قال انقلع مالت على وجهك الشين =لاعاد أشوفك عندنا يالزلابه
قلت ابشر ابشر لكن الباب من وين =واقفيت من عنده على صوت بابه

مع تحياتي أخوكم أبوسعـد