البارحه سهران والناس ممسين=قامت تقلبني هواجيس وأحزان
كني مع الهاجوس في بحر قزوين=وكني مع الهاجوس سابح وغرقان
وسألت نفسي قلت ويش يسهر العين=قالت حزينةٍ والله على موت سلطان
قلت لاجاء القدر ماينفع يسار ويمين=لاجاك ماينفع بني عم وإخوان
الموت حق والقضاء فيه راضين=ويلهم ذويه بكل صبرٍ وسلوان
وإللي جرى غصبٍ على حسن وحسين=حادث مرور وشايفينه بالأعيان
يالله ياقابل دعوة الملبين=بوجهك يارب البيت تغفر لسلطان
في جنه فيها نهور وبساتين=يعوضه الله في شبابه بالأجنان
ومن بعدها سلم على الربع ياحسين=يابوعلي لاجيت ذربين الأيمان
الطيبين العارفين الوفيين=موثقين الطيب والفعل برهان
يستاهلون النعم منا ملايين=الله يبيض وجيهكم يا الشريان
وجميع السادا الرجال الميامين=أللي لهم في صفحة المجد عنوان
زحول الرجال إللي على الطيب ضارين=تسابقوا للطيب شايب وشبان
فكوا ولدنا ما خذا غير يومين=ما قالوا إن الورع بالسير غلطان
يتراكضون وكلهم مستعدين=متوارثين الطيب من ورث جدان
منا لهم بيضا بروس الضلاعين=من الكويت إلى جنوب نجران
من لابتٍ لاجاء الملاقا شجيعين=قبابنه لاركبوا على الخيل فرسان
لاصاح عند وجيههم واللقى شين=يافرحتك لمن تعزووا بقبان
لاطبوا الميدان والله سلاطين=تاريخهم معروف في ماضي الأزمان
والخاتمه صلوا على باعث الدين=على النبى المصطفى نسل عدنان