بسم الله الرحمن الرحيم
اخوكم العــروان يسلم عليكم ويتمنى ان يكون خفيف الظل عليكم
لعل المولى يرحمني واياكم والمسلمين اجمعين .............
مافيه الاسلامتكم
عنواني استوحيته من مادار في خاطري
وانا جالس في التنهات وبيالة الشاهي ماودك باحسن منها
جلست انظر الى الحال واتفكر في النعم التي من الله علينا جميعا بها
نظرت لهاك الرجال يلعب وعياله كوره ويضحك هو واياهم
ومبسوطين فطرى علي هاك المسكين اللي مرافق عند ولده
بالمستشفى يغسلون لوليده كلاه ويتمنى انه يفداه بروحه
فقلت يالله لك الحمد ...
اشوي واناظر جمال هالعشب الزين نوع شكله كذ1 ونوع شكله كذا
ولونها كذا ويطري على هاك المسكين العميان اللي وده ويتمنى
ربع عين بس المهم يبصر فقلت ياربي لك الحمد والمنه.....
قمت من مكاني اتمشى في هالروضه والقى هاك الرجال هو وزوجته الله يستر عليهم
جالسين ومشغولين ببعض فعلى طول ذكرت هاك المسكين
اللي متناشب هو وزوجته بالمحاكم محروم من البر ومن ساعة الصدر
ومتبهذل وعيال منطلين منا فقلت يارب لك الحمد والشكر ....
عودت وجلست مع الشباب والى يالله لك الحمد كل شي على هالفرشه
الكليجا والمعمول والشاهي الاخضر والاحمر والقهوه
والتمر والعلوم الغانمه ويطري علي هاك الرجال اللي يكدح
من اول نهاره الى ليله ويالله يجيب لعياله شي ويمكن ياكلون خبز يابس
ينشب في حلوق عييله فقلت يالله لاتغيرها من نعمه.....
ثم ناظرت مع هالعلوم الغانمه والى صحن فاكهه يمكن فيه عشرين صنف
طري ومغسول التفاح من بلد والبرتقال من بلد والموز من بلد والكيوي من بلد
والخوخ من بلد وووو بتتعب يالله لك الحمد فذكرت هاك الايه (وضرب الله مثلاقرية
كانت آمنه يأتيها رزقها رغدا من كل مكان فكفرت بأنعم الله فأذا قها الله لباس الجوع والخوف
بما كانوا يصنعون) يارب اجعلنا من من يحمدك على النعمه ولايكفر بها.
المهم جلسنا لين المغرب قلنا بنمشي قالوا الشباب تونا مبكرين العوائل ماراحوا وشلون حنا
واذكر نعمة الامن علينا ياجماعه ناس وربي الكعبه مايامنون على انفسهم في بيوتهم
فكيف لو طلعوا للبر وخيموا ثلاثة ايام والااربعه وحنا يالله لك الحمد نخيم ونطرق الطريق
الف كيلوا في هالبر انت وعيالك مايصيبك شي باذن الله فياربي لك الحمد والشكر.....
جلسنا نسولف شوي عقب ماقالوا الشباب نجلس وصلينا ويمر علينا
هاك العامل تبع البلديه واثنين معه يظفون عقب الناس فوالله اني حمدت ربي
وشكرته هالحين هالضعوف تاركين اهلهم وعييلهم وجايين من اصقاع الارض
علشان لقمة العيش وياليته في بلد في بر متغربين فيالله لك الحمد حنا الواحد عند اهله عند اميمته وابيه وعياله
وماشية دعواه فياربي كم احسنت علينا وكم اعنتنا وكم يسرت لنا اللهم استعملنا في طاعتك...
مشينا عقب ماصلينا المغرب ووصلنا للرياض ولله الحمد من دون تعثر
ولا توقف فاللهم لاتغيرها من نعمه يارب العالمين ....................
اخواني دائما الواحد يتذكر من هو اقل منه فيحمد الله ويشكره فبالشكر تزيد النعم اللهم اجعلنا من الشاكرين
لنعمائك وادخلنا الجنة مع الابرار ووالدينا ووالديهم والمسلمين والمسلمات الاحياء منهم والاموات انه سمع مجيب
تحياتي اخوكم العـروان
العرض الشجري
