سجل حضورك بـ ( بيت من الشعر )

عمر الرجال ماقيمت بالمظاهر=ياللي تقول إن المظاهر هي الكل
صحيح أنا طفران والحظ عاثر=واليأس ماعمره على خافقي حل
لكن خلقت من فضل ربي مثابر=للقمه أكدح في حياتي ولا أمل

محمد القباني

 

خلك مع اللي يكسبون الطويلة=حمّاية التالي إلى نشّف الريق
ولا شلت لك حمل ٍ وضامك مشيله=شالوه ماهي بالحكي واللصاميق

سعد المقري

 

ياعشير ٍ تردى في عشيرة=كان يطلب مصالح وإنتهت
عشرة المصلحة دايم قصيرة=إن مشت يوم ثاني وقفت

علي القحطاني

 

ياونتي ونة كسير الجبارة=إلى وقف ما أحتال وليا قعد ون
عليك ياشباب ضو المنارة=عليك ترفات الصبايا ينوحن

ضيف الله بن تركي بن حميد

 

صليت في الجامع وسبحت تسعين=مع كثرهن وأتبعتهن تهليله
وقريت عمّ والمدثر وياسين=وزبنت رب ٍ مايخلي دخيله
وقريت وردي عن جميع الشياطين=وشبيب ماسوى به الورد حيله

سليمان الطويل

 

اللي يبينا عيت النفس تبغيه=واللي نبيه عيا البغت لايجيبه
ياعين شوفي زرع خلك وراعيه=هذي معاويده وهذي قليبه

نورة الهوشان