يالله انا من جود حسناك طـالبك=عفوك ومدك حيث ماانت بخيلي
يالآدمي دنياك هذي تعذبك=لوطفت فيها مالقيت الدليلي
كل ٍ على مذهـب إمامه يخاطـبك=يبيك من زايد ذنـوبه تشيلي
واليا عصيت أهل المذاهب تعتبـك=كل ٍ يقول أبـيك يمي تجيلي
ولو انتحيت بعيد بالسـؤ تطلبك=وكـل ٍ بصاعه من ذنوبه يكيلي
أحـد ٍ يصحح لك حديثه ويرهبك=وأحد ٍ يقول الحق عندي نزيلي
وأحد ٍ يخيفيك في كلامه ويدبك=وابليس يضحك له وهـو مستشيلي
الناس عوجان المناطق تكذبك=وعن الصحيح الكذب معهم بديلي
إن مارضـيت بقولهم نتف شاربك=وتكبر ذنوبك لوغناك تهليلي
ناس ٍ عـلى درب الفضيلة تحاربك=وعلى دروب الشـر تهذل هذيلي
ودروبهم عسـرات عـوج وتتعبك=ما تستوي لك لا ولا تستويلي
ينبيك عن دنياك ماضي تجاربك=وعزي لحالك كان عرفك قليلي
اتبع نبيك واترك اللي مجنبك=واقضب مماشي سنته لا تعيلي
اللي بغار الثور للرشد يندبك=وأبوبكر عنده نديم وخليلي
نصايحه للرشد حذرا تغايبك=هـرجه صـحيح وكل فعله جميلي
سـنة نبيـك للفضيلة تقربك=المصطفى ماله شـــبيه وعديلي
وأحذرك عـن نقالة السو تقربك=ومن يتبع العايل لزوم ٍ يعيلي
لو أنت ماتغضب ترى الناس تغضبك=وعقب المعزه يجعلونك ذليلي
وترى ردي العرق للعيب يجذبك=وتصير بدروب الـردا له عميلي
وبنت الردي حذراك حـذراك تعجبك=واحـذر تصير لمثل هذي حليلي
وعن مايعيب النسل عرب مناسبك=وعليك في بنت الحصـان الأصيلي
يجي ولدها فارق ٍ عن قرايبك=ويقيف في وجه الخصيم القبيلي
إن كبرت القالات بالفعل يعجبك=ويبرد هـمومك كان قلبك غليلي
مثل القطامي في هداده يشببك=والدم من مخلاب كفه يسيلي
ليا صار ماصلبين الأرياء مكاسبك=تراك بين الناس تبقى هـزيلي
وترى دروب الخبث يالعبد تذهبك=ويفوت عمرك ما تحصل حصيلي
إحذر يابن حوا تطمن لحاجبك=إلا لرب ٍ للخلايق يزيلي
اللي بعفوه عن عذابه يرغبك=وعينه لكل الخلق دايم تخيلي
في لوحه المحفوظ يالعبد مذهبك=نزل بحق وكل ما به فضيلي
ومعاشر الخايب مع الناس يذربك=وتصبح قليل الميز عقلك هبيلي
ومعاشـر الطيّب على الطيب يجلبك=ويرقيك للعليا بظل ٍ ظليلي
لا تقرب الأجرب بالأمراض يعطـبك=يصير جسمك مثل جسمه عليلي
ممشى الخنا من صافي العقل يسلبك=ويصير لك يم الرذيلة سبيلي
وعـن مارد الأنذال نزه مشاربك=واشرب نظـيف لو ورادك طويلي
ولياك تنسى يابن الأجواد واجبك=واللي يروم المجد حمله ثقيلي
يالآدمي وإن كان كبرت مصايبك=إزبن على محي البلاد المحيلى
إزبن على رب ٍ بعرشه يراقبك=وناجه وبعد العسـر يسره جليلي
ناجه ولأجـل ارضاه وجه ركايبك=وخلك لعلاّم السـراير دخيلي
هـو الذي ينجيك من كود صايبك=ويذريك من كربات هــول ٍ مهيلي
يالعبد مكّن عند ربك مقاضبك=وفكر وقدّر وإنتبه لاتميلي
ولا أحـد ٍ من الخلاق يالعبد حاجبك=هو الذي مدّه وعفوه جزيلي
وهو الذي في مافعلته يحسابك=وهو الذي بأرزاق عبده كفيلي
الأمير / محمد الأحمد السديري
العرض العادي
