حبيت ان انقل لكم هذه القصيده لهواه البر
وآمل ان تحوز على اعجاب الجميع..
يامحـلا لاشـدوا الجيـب بالعـفـش=شاصي وكمـل عزبتـه عنـد جابـي
جديد والبودي نظيف(ن) مـن الخـدش=واللـون بيـج وماركبـوه الشبـابـي
واريل جهاز وفـوق صدامـه الونـش=وكشاف والدربيـل ضمـن الزهابـي
ومقفص(ن) يبراله افضل من البـورش=بمسجلـه شرطـان شعـر وحجـابـي
وخوة نشاما ماحسبـوا يـوم للقـرش=كبـار العقـول قلوبـهـم ماتهـابـي
بارض(ن) يجفل صيدها همل الطـرش=والفقـع صلـع شـال عنـه الترابـي
حول العيلـي والرحـى والمطـر رش=وقبلـه جلـى عنـا كثيـف الظبابـي
يازين مجلاس(ن) على الأرض والفرش=عشب(ن) مع البطحا صبـغ بالثيابـي
وجمع الحطب من قبل مانرمـي القـش=فـرس(ن) توقـد والغظـا بالتهـابـي
وسواة فنجال(ن) على الجمـر ينعـش=لاروحت ريحه خاطري منـه طابـي
مع حلوة(ن) للجـوف تمـره مجـرش=او سكريـن واستـوى بحـر آبــي
وبمعدنن من صنعـت الهنـد ماغـش=شايـه ربيـع وسكـره دوب ذابــي
هاذي منـاة العمـر والعيـن ترمـش=وباقـي المنايـا لوغـدت لسـرابـي
وصلاة ربـي عـد ماينـزل الطـش=علـى محمـد سـورتـه بالكتـابـي
العرض الشجري
