قصيـدة أبن ثلاب الوطنيـه ،

بسم الله الرحمـن الرحيـم

اخواني الزوار الكرام ،، هذه قصيـدة لـ الشاعر / راشد بن خريزان آل ثلاب القباني ،،

هاظت بها قريحـة الشاعر : تجديدا للولاء الوطني ، وحباً في ارض هذ1 الوطـن ،المعطاء



جعل السحاب اللي تكاشف بروقه .=. يسقي وطنا من ثقيلات الأمزان

يرعد ويـرزم والهبايـب تسـوقه .=. من فضل ربي خالق الأنس والجان

يمطر على الغيل المسمى حقوقه .=. تسيل شعبانه معَ راس سمران"1"

دار الجلالي كل طيبً يشوقه .=. له في سجل المجد فعل وبرهان

عينه على شوف النشاما شفوقه .=. وقلبه على فعل المواجيب شفقان

تاريخنا محدً تجرأ يعوقه .=. حنا هل الطولات ذربين الأيمان

يرسخ بنا غرسً تمايل عذوقه .=. وادي السري عله من الوبل هتّان

حنا هل البل كل ملحاً رفوقه .=. جرداً عليها الباب وسـمً لنا بان

الضيف يلقى له معزه وروقه .=. يلقى الشحم والهيل في كل صيوان

وليا عطينا للعهد مانبوقه .=. حنا معَ آل سعود شيـبً وشبّان

جدّي وأبويه متعبـاتَ طروقه .=. مع المؤسـس طير شلوى كحيلان

في ضربهم ماتنـترقـع فتوقه .=. يشهد على قولي جرابً"2" وكنزان"3"



(1) سمران : أحد الاوديه الفرعيه لـ وادي الغيـل

(2) جراب : احد المعارك اللتي شارك فيهاالامير/ خريزان بن حمد بن ثلاب مع الملك عبدالعزيز في توحيد المملكه العربيه السعوديه

(3) كنـزان : ايضـاً احد المعارك اللتي شارك فيها الامير / خريزان بن حمد بن ثلاب مع الملك عبدالعزيز في توحيد هذ1 الصرح الشامخ