قصيدة للشاعر / رشيد بن مساعد القباني
مهداه للإستاذ / فرحان بن محمد بن حمد آل فرحان
مدير مدرسة عبدالله بن عباس الإبتدائية بقرية حراضة
في إحدى السنوات مر على قرية ( حراضة ) في محافظة الأفلاج قحط شديد نتيجة تأخر سقوط الأمطار مما نتج عن ذلك جفاف الآبار وكان مما تضرر من ذلك مزرعة رشيد بن مساعد القباني حيث جفت البئر وضاقت بعينه البسيطة ،ولكن الرجال مواقف حيث قام / فرحان بن محمد بن حمد آل فرحان وقطع على نفسه وعد بأن يتكفل بجلب المياه بسيارته
الخاصة ( الوايت ) من موقع مشروع سقيا مياه حراضة وقد تحمل مشاق ووعورة الطريق وبعد المسافة وفاءاً للجيرة وعشرة السنين وإن دل هذا فإنما يدل على مكارمه التي لا تعد ولا تحصى وما هذا العمل إلا واحد من الأعمال الخيّرة التي يقوم بها ،والشاعر رشيد أراد أن يرد الجميل من خلال هذه القصيدة
يقول من هو صاغ زينات الألحـان=مثايل ٍ يطـرب لهـا كـل قصـاد
بيوت ٍ معانيهـا جزيـلات وسمـان=أصونها عـن كـل خبـل ٍ ونقـاد
وأخص بها ريف المسايير فرحـان=قرم ٍ يمينه في القسى تنفـد الـزاد
عز الله إنه وافـي ٍ طيـر حـوران=مني له البيضاء على روس الأشهاد
من مصر تنشر لا ضواحي نهيـان=ومن اليمن تنشر إلى سـوق بغـداد
فرحان لا عـدوا طليقيـن الأيمـان=له مع هل المعروف مصدر وميراد
طيبه حقيقـة مـا تغيّـره الأزمـان=لا جيت أبا قاضي جميله علـي زاد
حصل مجال وقلتنا الحيش عطشـان=والوايت اللي جبت له صار مافـاد
ومشّى لي الوايـت لسقيـاه مجـان=أوعد ولا أخلف كلمته قـرم الأولاد
فرحان له في المعرفة والوفاء شان=أبو محمد شـوق نقـاض الأجعـاد
أبوه له في مركز الطيـب عنـوان=عن منهج أهل العرف والطيب ماحاد
بـأثني عليه وأبمدحه سر وإعـلان=وأقول أبو فرحـان للطيـب معتـاد
وجهه إلى جوه المساييـر ماشـان=ماهـوب مثبـور ٍ لوجهـه تعقـاد
ياما ذبح كبش ٍ سمين ٍ من الضـأن=ولا هوب عن كثر المخاسير نشـاد
ما قال أنا شايـب فقيـر ٍ وعميـان=بـأخلّي سلوم النشامـى والأجـواد
راعي الكرم مهما خسر وأنفق معان=ولا ينول الجود ياكـود مـن جـاد
وفرحان له تقديـر منـي وعرفـان=مانيب للمعـروف منكـر وجحـاد
مادامني حـي ٍ ترانـي لـه مـدان=وإلى مت أنا بكتب وصاة ٍ للأحفـاد
ولا نيب في مدح الوفييـن خجـلان=مهما يقال بصيفة الأمـر وش عـاد
لك بالرخاء صدقان والضيق صدقان=وربع الرخاء عند القسى قلة أعـداد
ياكثرهم لا صارت سهـود وآمـان=وإن جاء لزومك عنك يقفون شـراد
قلته وأنا ما أسند على فلان وفـلان=أقول عند الضيق يلقـون الأمجـاد
وصلاة ربي عد مـا كايـن ٍ كـان=على الرسول اللي هدانـا للإرشـاد
العرض الشجري
