منتديات القبابنة - يالله أنا طالبك حمراً هوى بالي

قصتنا اليوم مع الشاعر فراج بن ريفه القرقاح القحطاني حيث كان هناك إمرأة تسمى (نيله) سمعت عن شهرته وشجاعته وكانت حريصة كل الحرص على أن تشاهد لذا أوجدت جائزة بكره من ابلها للي يمكنها من شوفته وفي يوم من الايام جاء فراج ضيف على جماعة (نيله)وجاء واحد من عيال الحي وراح لنيله وقال لو مكنتك من شوفة فراج بن ريفه وش الله عطاني منك قالت : أبد أنا على شرطي ولك البكره فأخبرها أنه ضيف عند البيت إلى بضيفتهم فراج فسارت المرأة لذلك البيت كأنها تدور لها حاجة وهي بالحقيقة ماودها إلى بشوفة فراج المهم إنها تمكنت من رؤيته ولكن لم يروق لها حيث كان رجل ذو سمرة من أواسط الرجال في طوله وهي كانت متخيلته رجل طويل ذات بشرها حمراء فضاق صدرها وبانت حسوفتها على البكره التى أظهرتها جائزة من أجل التمكن من شوفته والتي في نظرها أنها راحت هباء فتسرب الخبر في الحي حتى وصل فراج بن ريفه فقام يبحث عن بيت (نيله)وراح لها تحت أعين الناس فلما قابلها أنشد هذه الأبيات

سـلـم علـى نـيـلـه بـوسـط الجماعـه=فـإن الـسـلام الجرز مافيه منقـود
يـالـيـتـهـا معنا على الـهـجـن سـاعه=حتى تعذر وجيهنا لاغـدت سـود
في الليل نسري مثل راعي زراعه=وباليوم تلفحنا السمايم على القود
حـتى تـمـيـز مـن صـبـي الـشـجـاعـه=وتشوف من هو كنه السدو ممدود
وتـشـوف خـبـل حـرفته فـي مـتاعـه=لايـقـضـي اللازم ولاهوب مفقود
وتـشـوف صـمـال بـتـوع ذراعـه=مـثـل الـفـهد يأتي من الصيد بـضمود

ومن قصائده المشهوره القصيدة التالية

قال ابن ريفه بدا في المرقب العالي=بأعلى المراقيب تومي بـه هبايبهـا
مايدهله كود صافي الريش والوالي=وإلا الولع يوم يفتك فـي عجايبهـا
هيضني الرجم وأنا مـن أولٍ ٍ سالي=لهم على القلب ديران شطيـت بهـا
يامرقبٍ جاك مـن الأمطـار همالي=إنصوب صيف ٍ من المنشا يهل بهـا
لهم عليه أشـدوق الثفـن لاسالي=وعطفة طريب ليـا زافـت جوانبهـا
لما غدا الفيـض كنـه زرع عمالي=سيله مـن القـدم للبطنـان ناهبهـا
كم مرةٍ قـد نزلنـا عشبـه المالي=ببيوت لامن وزا المجرم يلـوذ بهـا
نبنـي بيـوت بعـراف وجهـالي=وإن جاء النذر من حفيف ما نتربها
بعوال مفلـح وهـم حمايـة التالي=بمصقـلات ٍ عطيـبـات ٍ ضرايبـهـا
صبيان قوم ٍ تحـل المنجـم الخالي=كسابـة المـدح حمايـة ركايبـهـا
ربعي عبيدة وأنا من حربهـم جالي=هل صبحة ٍ فالضحى تشعى كسايبها
وإنشد عبيدة هل الطالات من حالي=وإنشد الأجانيب يـوم إنـا نقاربهـا
من هو يقلط على فـرش ٍ وفنجالي=سعد إبـن عمـه ليا جاتـه مكاربهـا
لمـا غـدا بيـن نقـاض ٍ وفتـالي=وصفوا ألاجانيـب وأذتـه بطلايبهـا
عديتهم ثم نسفت بهم على الجالي=نسف الدلي للمعدي صـوب جاذبهـا
فإن كان ربعي نسوني ماني بغالي=بأعيش فـي ديـرة ٍ قفـر ٍ جوانبهـا
عسى هل الشين مايبقى لهـم تالي=وأهل سلوك الـردى يـارب تذهبهـا
واللـي رفيـع ٍ وللشطـات حمالي=إرفع نواصيـه يـا ربـي وقطبهـا
أنا من الخبرة اللي شورهـم عالي=وإما هل البخـل بأمـر الله نجنبهـا
ياراكب ٍ من على اللي مشيها إرمالي=مامونة ٍ يرفـع الهـلان غاربـهـا
تزهى السفايف وتزهى الخرج وحبالي=ومجرب ٍ لا سرا في الليـل صالبهـا
حي الطويله وحي اللي شراهـا لي=من واحد ٍ جابهـا للسـوق جالبهـا
شريتها في الدهر يوم أرخص الغالي=بميه وعشرين مـا يمهـل بغايبهـا
حديدهـا وأذكـر الله كنـه ريالي=كن الحيايا تطـوى فـي مقاضبهـا
بنـت ٍ غراهـا زبـاد ٍ عنـد دلالي=وإلا طموح ٍ هواء الغربـي يلاعبهـا
لي بندق ٍ ماصنعها الصانـع التالي=من دقـة المـرك نحـال ٍ خشايبهـا
عطوا الطويله عريب الجد والخالي=وابن الردي لا تخلونـه يـزول بهـا
بيدي قـرار ٍ تكـف الجمـع لا إنهالي=طويلـة ٍ ناحل ٍ مقـدم خشايبـهـا
أضرب بها الوعل لا منـه تهيالي=أبوحنيـة كبيـر الـرأس شايبـهـا
لا ثـار بارودهـا لا العـود متالي=منهـا الريـايا مقطعـة ٍ نشايبهـا
ضربت عشر ٍ بهـا والفـي ما مالي=والحاديـه روحـت تثلـغ مضاربـها
آقف مع لابتي وأمنـع بهـا التالي=لاهاب ولد الـردي ماعـاد يزهبهـا
إليا لفونـا مـن المقنـاص زعالي=أحد ٍ مـدح بندقـه وأحـد ٍ يعذربهـا
بشرتهم بالعشاء من عقـب مقيالي=والقايدة من مـرد الكـوع ضاربهـا
وأسرح بها في السحر مانيب كسالي=وكم جملة ٍ فرقـت منهـا ربايبهـا
يالله وأنا طالبك حمـراً هـوى بالي=حمراً من الجيـش طفـاح ٍ جنايبهـا
لاروح الجيش حادية أشهب اللالي=لا هي تروح وسيـع صـدر راكبهـا
اللي على كورهـا واللـي بالحبالي=واللي على متنها واللـي بغاربهـا
لا روحت مع تخاتيخ الخـلا الخالي=كن الذيابة تنهـش مـن جوانبهـا
وأستغفـر الله وحـده فوقنا عالي=وحطيت فـي حفـرة ٍ رزوا نصايبهـا

وإلى أن يحين لنا الموعد مع قصيدة وسالفة جديدة تقبلوا تحياتي
ودمتم برعاية رب العزة والجلال