عز الله انه ياسعد خاطري شان=من يوم قلت انه تدانا عضيدي
وقفتنا منحاس والبال عمسان=مثل الصويب اللي صوابه مجيدي
ياليت لي لامن تكدرت جنحان=واطير لاصار المسافه بعيدي
الصدر كنه يشتعل فيه نيران=نار لهبها بالضماير يزيدي
والعين هلت دمعها فوق الاوجان=في نونها كنه يسعّف جريدي
واقول كفي عنك ياعين الاحزان=ترى العباير والبكاء ماتفيدي
ياعين وين فلان وفلان وفلان=جيل فنى ويعيش جيل جديدي
الموت ماخلى شباب وشيبان=من جاه يومه مات بأية صعيدي
مكتوب اجله في نواصيه عنوان=اما شقي فلان والا سعيدي
الموت مال احد على الموت سلطان=للعالم اقرب من حبال الوريدي
ياما خذت لاقدار من كل ديفان=باقدامها تدوس خطلان الايدي
وحطت لهم في وسط الالحاد مسكان=ولهم بعد نفره بيوم الوعيدي
في ساعة ينصب للاعمال ميزان=وكل يحصل ماجمع من رصيدي
اللي رصد حسنات يجزاء بالاحسان=في حوزه اهل الخير يكتب شهيدي
واللي رصد سيئات مفلس وخسران=يحشر مع اهل الشر نكد ونكيدي
وماكتب للانسان يرضاه الانسان=رب الملا يفعل على مايريدي
خضر النعم مادامت لكائن كان=من خلقة الدنيا نزول وشديدي
ياسين ياهيف الغنم طير حوران=انا اشهد ان من مات مثله فقيدي
لاحس لقارب ولاحس جيران=ولاهوب لاجات اللوازم زهيدي
عسى ان توفى يسكنه عالي الشان=في جنة الفردوس قصر مشيدي
يسكن مع الابرار جنه ورضوان=مسرور بجوار الصحابه خليدي
وصلوا عدد ماهل من المزن ودان=واعداد ماجر الحمام اتغريدي
على المشفع بامته نسل عدنان=في ساعة منها يشيب الوليدي