هلا والله
بحد الرهيف وولدبداح
الله مير يسلمن ويسلمكم
هذا كان عندي هارتوب قديم حق الشايب الله يرحمه هو الورث الوحيد منه وإلا لوكان عنده ورث كان ماطقيت هايلوكس المهم هالهارتوب يالله يمشي الدداسن والهايلوكسات القديمة تسبقن رحت به للصناعية مااحدن عرف العلة وانا اللي اوديه للعبندي ببريدة هذا اكبر مهندس عندنا يوم شافه على طول فر الديلكو وقال ظف وجهك ورح غير اسلاك البواجي وغير بليتين المهم رحت ادربي راسي واشتري اللي قال ومن عقبه وهو اللي ماشاء الله مثل البارودة وما استمر معي رحت للرياض وانا اطق الطبلون قام واحتر وانا اللي اوقف عند نفود الثويرات وافتح الكبوت وإلاه مختلط زيته مع المويه ويخبط
واروح اسحبه بونيت الربدي لين وصلنا الرياض ويقوم اخوي ويهاوشن وتدري الوالدة الله يطول بعمره وهي اللي تفك الزحمة وترضين قالت ياوليدي نم الليلة وباكر ان شاء الله اشتري لك هايلوكس ( نفسي فيها من كنت صغيرون ) نمت هاك الليلة ويوم جاء الصباح وإلاهي تصحين قم الساعة خمس العصر ورح مع أخيي للمعارض وانا اللي افز فزت الهايلوكس واشتريها ومن ذاك اليوم الى اليوم وهي سالكة قولوا ماشاء الله لاتنحتونن مشاكل ياهي دوخت راس
عاشق نجد