المناقيد عند العرب (عيب وشق جيب)

مراحب احلى اعضاء

المنقود هو عيب أجتماعي لايحرمه الدين
عند العرب مناقيد واجد ...
يعنى نقد واستنكار لتصرف ما
يمكن يشوفه البعض عادى
بس هو يعتبر فعل منقود ...
عييييييييييييييييييييييييييييييييييب وشق جييييييييييييييييييب
يعني
وخزيااااااااااااه
وفشلتااااه
وعيباااااه
جمعت لكم مجموعه من مناقيد العرب
التصرفات اللى تخليك موضع استنكارعند العرب
يعنى لو سويت الفعل
وفضحك بين العربان



عيب عند الشيبان ان الشاب
يكون بدون شماغ .. او يلبس كبوس ويروح المسجد



وعيب على الرجال يمد القهوه باليسار
>>> وانا صغيره صبيت لقهوه لجدتى وفتحت الدله بشوف باقى شي
ومالقيت الا العصى يمحط على ظهرى
ارتكبت منقود
عيب تفتح الدله وتشوف وش فيها
قدام من تقهويه ...
ومن المناقيد عند العرب
ان تقوم من العشاء قبل ضيوفك ... اصبر الين مايخلصون
ومن المنقود ان تضحك بمجلس به كبار السن
ينظرون لك بربع عين
ويقال من هو ولده جعله المصع اللى يضحك ضحك عصبه
عيب وشق جيب ...
ومن المناقيد الاجتماعيه ..
عيب ان الواحد يدخن قدام ابوه
او عمه ابو زوجته ....
منقوود يعرفون اسم امك او اختك
عاد هذه فيها قبايل ودم للركب ...
منقود تقطع سالفه غيرك بالمجلس
منقود على الرجال ينام فى بيت بنته بعد زواجها
او ياكل فى بيتها ...
وهذه تعد من السود عن العرب
يعنى فيها سواد وجه ...
من المناقيد ,,,الرجل مايسمى اكبر عياله باسم ابوه
حتى لو اسم ابوه
شليويح او نجر
القدر بالصدر مو بالاسم
من المناقيد تقلط لضيوفك دجاج باول مره يطبون بيتك
لازم مفاطيح ..
من المناقيد الرجل يرد واحد خطبه لبنته ..
حتى لو مايبى البنت ياخذها جبر خاطر..
عيب الرجال ترد الرجال
من المناقيد البنت تحط كحل او زينه قبل ما تعرس
عيب وشق جيب
من المناقيد ,,, العريس صبحيه عرسه مايطلع الصبح
ويتاخر الى الضحى عند عروسه ياكلون وجهة الجماعه
من المناقيد الرجل يبكى
ويقال : تبكى مثل الحريمات نسبه الى الحريم
والدمع بالنهايه حاله انسانيه
ومن المناقيد الرجل مايفزع مع من طلب فزعته حتى بالشر
من المناقيد ترفض عزومه رجال حلف وطلق
واذا رفضت حرام تطلقت الحرمه وانخرب بيتها
اقبل بالعزومه ...
من المناقيد ماتقطع لحم للشايب وانت قالط على الصحن
من المناقيد ماتحضر مناسبات ربعك وجماعتك
من المناقيد سابقا ... يطلع الولد فى بيت لحاله بعد زواجه
لازم يجلس عند اهله فى بيت العائله ...
من المناقيد اول العروس تضحك وتكون مبسوطه
لازم تكشر وتبكى قدام الحريم ...
ومنقود على الرجال يخطب على خطبه خويه
يعنى يتقدم لخطبه فتاه خطبها واحد من جماعته
المناقيد واجد ...
اتمنى مايكون عندكم مناقيد على الموضوع

 

موضوع روعة ولك شكري وتقديري

 

مشكور عمار على المشاركة وفعلاً كان للعرب عادات وخصوصاً في القدم ولازالت حتى الآن إلا أنها مع الثورة الحضارية بدأت للتلاشي وإن كانت قليلة وهناك من لازال على تلك العادات في وقتنا الحاضر


تحياتي لك

 

يعطيك العافيه اخووي