موقع القبابنة لوحة تحكم العضو البحث تواصل مع الإدارة  




العودة   منتديات القبابنة منتديات القبيلة شعراء القبيلة وماقيل فيها

شعراء القبيلة وماقيل فيها سيره , قصائد , قصص ، شعر

قصيدة عام الحزن


إضافة رد
 
أدوات الموضوع انواع عرض الموضوع
قديم 03-09-2020, 09:27 PM   رقم المشاركة : 1
عضو





عبدالمحسن القباني غير متصل

عبدالمحسن القباني is on a distinguished road


 

قصيدة عام الحزن

وسمت القبر والقلب قبل ٱسمه موسوم
ابي كل من شافه يعرفه بوسم له
اكفكف دموعي عند راسه وانا المحروم
واداري خفوقي خايفٕ يلحقه خله
لك الله ياقلب العنا جد فيك ثلوم
عسى الله يثبتني على الدين والمله
انا من جلست أدعي وانا ماقويت آقوم
وأنا أرجي عسى مهيب رجلي منشله
ترى ريحة ترابه بصدري تجر هموم
بغيت آتجبر لكن الدمع يسبل له


الا واهنيك يالقبر ريحتك يشموم
الا واهنيك ليتني صرت لحدٍ له
اباشيل ريحه وسط جوفي ولا لي لوم
وابروي ترابه من خفوقي وابـ أعله
يـ لبيه ياراس عليك الثرى مردوم
ويـ لبيه ياحضن تذريت في ظله
الا ياقصيدي والله انه عليك اللوم
ابيها بيوتٍ تبري الكبد والعله
اسجج وامني النفس ليت العزى جاثوم
واغمض عيوني والبلا خابره كله


لك الله يا(عام الحزن) صار حزنك دوم
تتالت حزونك واحتسب والقوي الله
الا واعذاب العين لـِ زل وقت النوم
تكسر عباريها على هاجسٍ تله
تذكر عيوني كل ما صار هاك اليوم
وهي تحتضر للموت سبحان من دله
تذكرت يوم النفس فاضت مع الحلقوم
عيوني تراقبها وهي منه منسله
وتذكرت يوم النبض وقف ورى البلعوم
وانا موق عيني يزعج الدمع وتهله


الد النظر لــِ أبهامها والعيون اتحوم
أقلب جهاز القلب واقول لعله
لعله عقب ماصار شرطات يجي رقوم
اطفيه ثم استبدله ثم اعاين له
لا والله خذها الموت والعلم صار علوم
يَـ ليته خذى نفسي ولا حسها لله
طعني برمحه فوق صدري وهو مسموم
مثل طعنة الي من غريمه برد غله
وانا والله اني ماتهنيت في مطعوم
وانا اشوف كاس المر مع طعنته صله

وانا خابر ماشي فوق التراب يدوم
ولا دايم الا وجه من نرتجي ظله
وانا خابر ان العبد ماله عن المقسوم
ولكن فراق الموت تكفون وش حله
ذبحني الذهاب الي بليا لقا وقدوم
ولا فيه درب لا هتويته يوصل له
ترى كل همي كوم وابوي وامي كوم
ولو شفتني داله تراني على مله
يـَ لبيه ياوقت مضى راح مثل حلوم
ويالبيه ياذيك الفناجيل والدله


وي لبيه ياريح النخل ريحة المرحوم
وي لبيه من عقب النخل مجلس الفلة
وي لبيه ياجيل الوصل والسلوم سلوم
يروح العمر ماحدٕ ذكر منهم الزلة
انا لو اقلب كل ماشفت فـ الألبوم
واعيد الشريط الي من سنين وآفله
ابشوف لي صورة صغير بليا هدوم
تفل امه مهاده وتبكيه من قله
وابشوف لي صورة وانا توني مفطوم
وابشوفها تحمي لي الزاد وتزله


وأبشوفها تسهر وأنا غارقٕ فـ النوم
وابشوفها تذرى من العيش وتهله
وابشوف هبج العيش لـٍ قسموه سهوم
وابشوف صاع العود لـ قام يكتله
وابلقى الحمية والوفا والوصل مرسوم
وابشوف قوة باس فعلٕ على حله
وابلقى صلابة راس تقدح سطر وعزوم
وابشوف عز النفس ماخالطه ذله
انا ويش اعدد ياعرب كني المنجوم
ولو قِيِل لي عادي فـ ابقول لا بله


انا مع غثا الدنيا وحيدٍ تنحر قوم
يشيل الحمل متنه ولا احدٕ معه شله
وانا والله اني عقبهم كني المعدوم
اعبر حياتي واطلب الله وآجله
عسى الله يجمعنا بعد ما أفترقنا دوم
وعسى الله يجزاهم عن الي مضى كله
وعسى الله يجبرني مثل جبرة المضيوم
تقافو ربوعه والمرض خافقه سله
وانا والله اني راضيٕ والقدر محتوم
والاقدار مكتوبة على العبد بـ سجله


وابختم بذكر الواحد الخالق القيوم
وابطلبه يغفر ذنب عبده ويمهل له
واصلي على من ارسله للعباد عموم
عدد ماهمل وبل وعدد ماكسى طله


عبدالمحسن بن محمد القباني
ضرماء

 







  رد مع اقتباس
قديم 03-22-2020, 06:02 PM   رقم المشاركة : 2
فريق الاشراف
 
الصورة الرمزية محمد القباني






محمد القباني غير متصل

محمد القباني is on a distinguished road


 

الله يغفر لها ويرحمها صح لسانك يابومحمد أسأل الله العلي القدير أن يسكنها الجنة وأمواتنا وأموات المسلمين

 







توقيع :

[frame="6 70"]أمة لاتعرف تاريخها .. لاتحسن صياغة مستقبلها[/frame]

[align=center][/align]


[align=center]

[/align]
  رد مع اقتباس
إضافة رد


يتصفح الموضوع حالياً : 1 (0 عضو و 1 ضيف)
 
أدوات الموضوع
انواع عرض الموضوع

 

الساعة الآن 02:52 PM.



Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
Powered by Style ALRooo7.NET

Copyright © 2010 alrooo7.net. All rights reserved